اسلام آباد(سب نیوز)شہرِ اقتدار میں جلد بازی اور ناقص منصوبہ بندی کا ایک اور نمونہ سامنے آ گیا۔ صرف 84 دن میں 4.2 ارب روپے کی لاگت سے مکمل کیا گیا جناح اسکوائر پراجیکٹ بارش کی پہلی پھوار ہی برداشت نہ کر سکا اور زمین بوس ہو گیا۔
تفصیلات کے مطابق وزیرِ اعظم نے چند روز قبل اس منصوبے کا شاندار انداز میں افتتاح کیا تھا، تاہم جی-فائیو اور آبپارہ کی طرف مڑنے والی لوپ پہلی ہی بارش میں بیٹھ گئی۔ اس کے ساتھ ہی سرینا چوک کے قریب سڑک میں بھی واضح دھنساؤ دیکھنے میں آیا، جس نے منصوبے کی کوالٹی پر سنگین سوالات اٹھا دیے ہیں۔
شہریوں اور سوشل میڈیا صارفین کی جانب سے تصاویر اور ویڈیوز تیزی سے وائرل ہو رہی ہیں، جن میں ناقص تعمیرات کا پول کھلتا نظر آ رہا ہے۔ عوامی حلقے مطالبہ کر رہے ہیں کہ فوری طور پر اس منصوبے کی شفاف انکوائری کی جائے اور ذمہ دار عناصر کو کٹہرے میں لایا جائے۔
