اسلام آباد(آئی پی ایس )امیر اہل سنت حضرت علامہ محمد الیاس عطار قادری دامت برکاتہم العالیہ نے کہا ہے کہ آج بے دینی کا سیلاب برپا ہے اور سوشل میڈیا کے ذریعے دین کے خلاف فتنہ انگیزی عروج پر ہے، ایسے حالات میں ایمان کو محفوظ رکھنا ایک مشکل کام ہے، مبلغین کو چاہئے وہ اپنی گفتگو، روییاور انداز میں نرمی، بردباری و تحمل پیدا کریں، کیونکہ اس وقت دین کا کام پھونک پھونک کر قدم رکھنے اور تول تول کر بولنے کا تقاضا کرتا ہے، کہیں ایسا نہ ہو کہ کسی کا دل ہماری کسی بات سے ٹوٹ جائے اور وہ گمراہی کی راہ پر چل پڑے، لہذا ہماری نرمی، اخلاق اور تحمل مزاجی ہی دوسروں کو دین کی طرف مائل کرسکتی ہے ۔
امیر اہل سنت نے مبلغین کو خصوصی طور پر نصحیت کرتے ہوئے کہا کہ وہ اپنے اخلاق اور اندازِ گفتگو میں نرمی اپنائیں، اگر کسی کی مسکراہٹ سے کوئی فرد دین کے قریب آ جائے، تو اس کے ذریعے ایک خاندان دین دار بن سکتا ہے، لیکن اگر مبلغ کی سختی، تذلیل یا بے احتیاطی کسی کو دین سے دور کر دے، تو یہ بہت بڑا نقصان ہے۔ امیر اہل سنت نے والدین کے ساتھ حسن سلوک کے حوالے سے گفتگو کرتے ہوئے کہا کہ اللہ پاک نے قرآن کریم میں والدین کے ساتھ حسن سلوک کا حکم فرمایا ہے، کئی اولیائے کرام کو جو بلند مقام حاصل ہوا وہ والدین کی خدمت کے طفیل ہی تھا، آج کل والدین خصوصا عمر رسیدہ والدین کو اولاد کی طرف سے تکلیف اور بے قدری کا سامنا رہتا ہے۔ یاد رکھیں اللہ کی رضا والدین کی خوشی میں ہے، اور اس کی ناراضی ان کی ناراضی میں، لہذا اگر والدین بڑھاپے میں اولاد کے ساتھ سختی سے پیش آئیں تب بھی انہیں کچھ کہنے کی اجازت نہیں، حتی کہ “اف” کہنا بھی درست نہیں ہے، اللہ نے والدین کے سامنے تواضع اختیار کرنے کا حکم دیا ہے، اگر والدین واقعی زیادتی کریں تو ان کا حساب اللہ کے ذمہ ہے، اولاد کو چاہئے وہ اپنے والدین کو معاف کرے تاکہ آخرت میں ان کی گرفت نہ ہو۔
