تہران (آئی پی ایس )مشرق وسطی سے لگی آگ وسیع جنگ میں تبدیل ہونے کا خدشہ پیدا ہوگیا، ایران نے اسرائیلی حملوں میں امریکا کو برابر کا شریک قرار دے دیا۔ ایرانی وزیر خارجہ عباس عراقچی کا کہنا ہے امریکا کو خمیازہ بھگتنا ہوگا۔ اسرائیلی حملے امریکی مدد کے بغیرممکن نہیں تھے۔ انھوں نے واضح کیا ایسے کسی معاہدے کا حصہ نہیں بنیں گے جو جوہری توانائی کے حصول سے روکے۔
عباس عراقچی نے یورینیئم کی ساٹھ فیصد سے زیادہ افزودگی جاری رکھنے کا اعلان بھی کر دیا۔ایرانی وزیر خارجہ عباس عراقچی نے ایک اہم نیوز کانفرنس میں کہا ہے کہ اسرائیل نے ایران کی جوہری تنصیبات پر حملہ کر کے سرخ لکیر عبور کر لی ہے، جس کے بعد ایران کو مجبورا اسرائیلی معاشی مفادات کو نشانہ بنانا پڑا۔عباس عراقچی نے کہا کہ ایران نے صرف اپنے دفاع میں جوابی کارروائیاں کیں اور یہ واضح کیا کہ اسرائیلی حملے امریکی مدد کے بغیر ممکن ہی نہ تھے۔ انہوں نے عالمی برادری سے مطالبہ کیا کہ دنیا اسرائیلی جارحیت کا نوٹس لے اور خطے میں امن کے لیے کردار ادا کرے۔ایرانی وزیر خارجہ کا کہنا تھا کہ ایران اس تنازع کو دیگر ممالک تک پھیلانے کا خواہاں نہیں ہے، اور ایران کی پالیسی دفاعی نوعیت کی ہے۔ انہوں نے کہا کہ امریکا کے ساتھ جاری جوہری مذاکرات میں معاہدے کا راستہ کھلنے کے امکانات موجود تھے، لیکن اسرائیل نے ان مذاکرات کو سبوتاژ کرنے کے لیے یہ حملے کروائے۔
عباس عراقچی نے افسوس کا اظہار کرتے ہوئے کہا کہ امریکا نے بھی مذاکرات کو ناکام بنانے کے اسرائیلی منصوبے میں عملی طور پر شمولیت اختیار کی، جو کہ افسوسناک اور خطرناک رجحان ہے۔ایرانی وزیر خارجہ نے دو ٹوک اعلان کیا کہ ایسے کسی معاہدے کا حصہ نہیں بنیں گے جو جوہری توانائی کے حصول سے روکے۔ یورینیئم کی ساٹھ فیصد سے زیادہ افزودگی جاری رہے گی۔وزیر خارجہ نے زور دیا کہ ایران خطے میں مزید کشیدگی نہیں چاہتا لیکن اپنے دفاع اور خودمختاری پر کوئی سمجھوتہ نہیں کرے گا۔ نہیں چاہتے کی تنازع دیگر ممالک تک پھیلے مگر مجبور نہ کیا جائے۔
