تل ابیب(سب نیوز )اسرائیل نے ایران پر فضا ہی سے میزائل حملے نہیں کیے بلکہ اسرائیلی کمانڈوز نے ایرانی سرزمین سے بھی اس کارروائی میں حصہ لیا، جس کی فوٹیج منظرعام پر آگئی ہیں۔ٹائمز آف اسرائیل کی رپورٹ کے مطابق اسرائیل کی خفیہ ایجنسی موساد آج صبح ایران میں ایرانی فضائی دفاعی نظام اور بیلسٹک میزائل لانچروں کے خلاف اپنی کارروائیوں کی فوٹیج جاری کی ہے۔
اس فوٹیج میں ایک ویڈیو بھی شامل ہے جس میں بظاہر دو خفیہ ایجنٹ ایران کے اندر سے میزائل داغتے ہوئے دکھائی دے رہے ہیں۔ایک اسرائیلی عہدیدار کے مطابق، موساد نے آج کی کارروائی کے لیے ایران کے اندر ایک خفیہ دھماکہ خیز ڈرون بیس تیار کیا تھا۔
ان ڈرونز کو تہران کے قریب ایک اڈے پر بیلسٹک میزائل لانچروں پر حملہ کرنے کے لیے استعمال کیا گیا، تاکہ اسرائیل کی جانب سے حملوں کے آغاز پر ایران کو اسرائیل پر کوئی پروجیکٹائل ( میزائل) فائر کرنے سے روکا جا سکے۔
ٹائمز آف اسرائیل کی رپورٹ کے مطابق ہتھیاروں کے نظام لے جانے والی گاڑیاں ایران میں اسمگل کی گئیں، اور ان نظاموں نے ایران کے فضائی دفاع کو ناکارہ بنا دیا اور اسرائیلی طیاروں کو ایران کے اوپر فضائی برتری اور کارروائی کی آزادی دینے میں کلیدی کردار ادا کیا۔تیسری خفیہ کوشش میں موساد کے کمانڈوز نے وسطی ایران میں اینٹی ایئرکرافٹ سائٹس کے قریب درست پوزیشن پر میزائل نصب کیے۔
