کیلیفورنیا (سب نیوز)بانی تحریک انقلاب پاکستان محمد عارف نے کہا ہے کہ بی جے پی کے رہنما کی طرف سے بھارتی طیارے گرائے جانے کی تصدیق کے بعد عالمی سطح پر بھارتی جھوٹ اور پروپیگنڈا ایک بار پھر بے نقاب ہو گیا ہے ، پاک فضائیہ کے شاہینوں نے مودی سرکار کوشکست ، ذلت اور رسوائی کا جو داغ دیا ہے وہ مٹائے نہیں مٹے گا ۔
جمعہ کو اپنے ایک بیان میں انہوں نے کہا کہ بی جے پی کے رہنما سبرامنیئن سوامی نے 5طیارے گرنے کا اعتراف کر لیا ہے ، اس اعتراف کے بعد بی جے پی سرکار کی پروپیگنڈا مہم بری طرح ناکام ہو گئی ہے، 6اور 7مئی کی رات پاک فضائیہ نے بھارتی فضائیہ کو فضا میں شکست دے کر مودی کی جنگی حکمت عملی کو بے اثر کر دیا،مودی سرکار کی ناکام حکمتِ عملی نے بھارت کو محاذِ جنگ پر کمزور کیا جبکہ دوسری طرف پاکستان کی طاقت میں نمایاں اضافہ ہوا ہے ۔
انہوں نے کہا کہ بھارت جنگ میں بری طرح شکست کے بعد اب اپنی پراکسیز کے ذریعے بلوچستان میں عدم استحکام پیدا کرنے کی کوشش کر رہا ہے ، فیلڈ مارشل عاصم منیر کی قیادت میں فتنہ ہندوستان اور فتنہ الخواج کا بھی خاتمہ کیا جائے گا۔ محمد عارف نے کہا کہ بھارت ناکام خارجہ پالیسی کے باعث سفارتی سطح پر دنیا میں تنہائی کا شکار ہو چکا ہے ، دنیا کا کوئی ملک اس وقت بھارت کے ساتھ نہیں ہے ۔
