مخصوص نشستوں سے متعلق نظرثانی کیس، الیکشن کمیشن نے تحریری گزارشات سپریم کورٹ میں جمع کرا دیں

اسلام آباد (سب نیوز)مخصوص نشستوں سے متعلق نظرثانی کیس میں الیکشن کمیشن نے تفصیلی تحریری گزارشات سپریم کورٹ میں جمع کرا دیں، کمیشن نے اکثریتی فیصلے پر اعتراضات اٹھاتے ہوئے موقف اپنایا ہے کہ مخصوص نشستوں سے متعلق تحریک انصاف کی جانب سے کسی بھی فورم پر استدعا ہی نہیں کی گئی۔
الیکشن کمیشن نے اپنی تحریری گزارشات میں موقف اپنایا کہ اکثریتی فیصلے میں یہ لکھا گیا کہ تحریک انصاف عدالت کے سامنے موجود تھی۔ لیکن حقیقت میں پی ٹی آئی نے کبھی مخصوص نشستوں کی استدعا نہیں کی۔الیکشن کمیشن کے مطابق مخصوص نشستوں کی فہرست پولنگ سے قبل جمع ہوتی ہے جبکہ بارہ جولائی کے فیصلے میں سنی اتحاد کونسل کو پی ٹی آئی سے بدل دیا گیا۔
کمیشن نے موقف اختیار کیا کہ انتخابات کے بعد مخصوص نشستوں پر نامزدگیوں کا حکم قانون کے خلاف ہے۔تحریری جواب میں کہا گیا کہ انتالیس ارکان کو قانونی طریقہ کار کے برعکس پی ٹی آئی کا قرار دیا گیا۔الیکشن کمیشن نے جسٹس منصور علی شاہ اور جسٹس منیب اختر کے ماضی کے فیصلوں کا حوالہ دیا اور کہا کہ اکثریتی ججز نے چودہ ستمبر اور اٹھارہ اکتوبر کی وضاحت پر نوٹس نہیں لیا۔کمیشن کے مطابق دونوں وضاحتوں سے قبل کیس کو تیرہ رکنی بینچ کے سامنے نہیں رکھا گیا اور اکثریتی فیصلہ آئین کے آرٹیکل دس اے اور چار کی خلاف ورزی ہے۔