اسلام آباد(سب نیوز)ایتھوپیا کے پاکستان میں سفیر، ڈاکٹر جمال بکر عبداللہ نے جمعہ کے روز ہائر ایجوکیشن کمیشن کے چیئرمین، ڈاکٹر مختار احمد سے ان کے دفتر میں ملاقات کی۔اس ملاقات میں ایتھوپیا اور پاکستان کے درمیان اعلی تعلیم کے شعبے میں دوطرفہ تعاون کو فروغ دینے پر تفصیلی بات چیت ہوئی۔اس موقع پر سفیر ڈاکٹر جمال نے چیئرمین ڈاکٹر مختار احمد کو ایتھوپیا کے وزیر اعظم ڈاکٹر ابی احمد کی جانب سے تعلیم کے معیار کو بہتر بنانیاور ملک میں جدید ٹیکنالوجیز کے فروغ کے لیے کیے جانے والے اقدامات سے بھی آگاہ کیا۔
انہوں نے پاکستان کے اعلی تعلیم کے وسیع تجربے اور معیار کو سراہا اور اس خواہش کا اظہار کیا کہ ایتھوپیا اپنے انسانی وسائل کی ترقی کے لیے ان تجربات سے فائدہ اٹھانا چاہتا ہے۔ سفیر نے اس موقع پر دونوں ممالک کے درمیان دیرپا اور پائیدار تعلقات استوار کرنے میں تعلیمی سفارت کاری کے اہم کردار کو اجاگر کیا۔ایچ ای سی کے چیئرمین ڈاکٹر مختار احمد نے سفیر کو ادارہ جاتی روابط کو آسان بنانے اور ایتھوپیا کے طلبا کو پاکستان کی سرکاری یونیورسٹیوں میں اعلی تعلیم حاصل کرنے کے مواقع فراہم کرنے کے لیے ایچ ای سی کی مکمل حمایت کا یقین دلایا۔ ڈاکٹر مختار احمد نے یہ بھی کہا کہ ایتھوپیا کی اعلی یونیورسٹیوں کے اعلی حکام کو 23 سے 25 جون 2025 کو رباط، مراکش میں ہونے والے چھٹے وائس چانسلرز فورم میں شرکت کے لیے مدعو کیا جائے گا۔
