واشنگٹن:امریکی صدر ڈونلڈ ٹرمپ نے کہا ہے کہ خارجہ پالیسی امورمیں زندگی میں آج تک جس بات پر سب سے زیادہ سراہا گیا، وہ پاک بھارت جنگ بندی کامیاب بنانا ہے۔
امریکی میڈیا کو ایک انٹرویو میں صدر ٹرمپ نے حیرت کا اظہار کرتے ہوئے کہا کہ پاکستان سے اچھے تعلقات ہونے کے باوجود امریکا اس ملک سے زیادہ تجارت نہیں کرتا، پاکستان سے بہت عمدہ بات چیت ہوئی، پاکستان کوامریکا نظرانداز نہیں کرسکتا کیونکہ تالی دونوں ہاتھوں سے بجتی ہے۔
انہوں نے کہا کہ اسلام آباد امریکا کے ساتھ تجارت کرنا چاہتا ہے، پاکستانی ذہین لوگ ہیں جو حیرت انگیز اشیا بناتے ہیں، مجھے حیرت ہے کہ قریبی اتحادی ہونے کے باوجود امریکا نے پاکستان کے ساتھ تجارت کیوں نہیں بڑھائی؟۔
امریکی صدر نے پاک بھارت تنازع اورجنگ بندی پرکھل کربات کی اور کہا کہ پاکستان اور بھارت چھوٹے ملک نہیں بلکہ بڑی ایٹمی طاقتیں ہیں، دونوں ممالک کے درمیان کشیدگی حد سے زیادہ بڑھ رہی تھی اور ایٹمی جنگ چھڑنے والی تھی، دونوں ایک دوسرے سے سخت ناراض تھے، ادلے کا بدلہ چل رہا تھا، یہ لڑائی مسلسل بڑھ رہی تھی اور میزائلوں سے زیادہ حملے کیے جارہے تھے۔
انہوں نے کہا کہ دونوں ملک ایک دوسرے پر زیادہ سے زیادہ قوت سے حملہ آور ہورہے تھے اور مرحلہ وہ آنا تھا کہ بات نیوکلیئر ہتھیاروں تک جا پہنچتی۔
امریکی صدر نے کہا کہ بہت سی وجوہات کے سبب نیوکلیئر جنگ کا تو لفظ ہی خطرناک ہے، یہ وہ بدنما ترین چیز ہے جو کبھی رونما ہوسکتی ہے۔
صدرٹرمپ نے کہا کہ ان کی پاکستان سے بہت عمدہ بات چیت ہوئی اورپاکستان کو نظرانداز نہیں کرسکتے، کیوں کہ تالی دونوں ہاتھوں سے بجتی ہے۔
انہوں نے پاکستانیوں کی ذہانت اوران کے ناقابل یقین حد تک شاندار اشیا تیار کرنے کی صلاحیتوں کا بھی برملا اعتراف کیا۔
