اسلام آباد(سب نیوز) چیئرمین سی ڈی اے، چیف کمشنر اسلام آباد اور ڈی جی سول ڈیفنس کی زیر صدارت سی ڈی اے ہیڈ کوارٹرز میں ایک اہم اجلاس منعقد ہوا۔ اجلاس میں سی ڈی اے بورڈ کے ممبران، ڈی جی بلڈنگ کنٹرول اتھارٹی، ڈی جی ورکس، ڈی جی ریسورس، ڈی جی اربن پلاننگ، ڈی جی ای اینڈ ایم، ڈی جی سروسز، چیف آفیسر آئی سی ٹی، ڈائریکٹر ڈی ایم اے اور دیگر سینئر افسران نے شرکت کی۔
اجلاس میں سی ڈی اے کی مجموعی کارکردگی کا جائزہ لیا گیا اور مختلف نئے منصوبوں پر بریفنگ دی گئی۔ میلوڈی فوڈ اسٹریٹ کی اپ گریڈیشن، فوڈ کوالٹی کے معیار میں بہتری اور فوڈ اتھارٹی، سی ڈی اے اور ایم سی آئی کے مابین کوآرڈینیشن کو مزید بہتر بنانے کی ہدایات جاری کی گئیں۔
میلوڈی میں پارکنگ کے لیے وسیع ایریا مختص کرنے اور جدید و خوبصورت لائٹس لگانے کی منظوری دی گئی۔ بلیو ایریا میں نئی فوڈ اسٹریٹ کے قیام، اعلیٰ لینڈ سکیپنگ، خوبصورت لائٹنگ اور پارکنگ کی سہولیات کی فراہمی کے ساتھ ساتھ منصوبے کو جلد فنکشنل کرنے کی ہدایات بھی دی گئیں۔
اجلاس میں شہر کے بڑے مراکز میں ٹریفک کنٹرول کے لیے مؤثر ٹریفک پلان مرتب کرنے اور اس پر سختی سے عملدرآمد کی ہدایت دی گئی۔ گاڑیوں کے بازار کے لیے مناسب مقامات کا انتخاب اور ٹریفک و پارکنگ کے مسائل کے فوری حل پر بھی زور دیا گیا۔
اس موقع پر گندھارا ہیریٹیج کلب کی اپ گریڈیشن سے متعلق بریفنگ دی گئی اور باقی ماندہ کام کو مقررہ مدت میں مکمل کرنے کی ہدایت جاری کی گئی۔ اجلاس میں شہر کے تمام پارکوں، مارگلہ روڈ اور دیگر اہم شاہراہوں پر خراب اسٹریٹ لائٹس کی جگہ نئی لائٹس نصب کرنے کی ہدایات بھی دی گئیں۔
