اسلام آباد(آئی پی ایس) سیکورٹی ذرائع کے مطابق بھارت نے 6 اور 7 مئی کی درمیانی شب پاکستان پر ایک بزدلانہ حملہ کیا، جس کا پاکستان نے فوری اور بھرپور جواب دے کر دشمن کو شدید نقصان پہنچایا۔
ذرائع کا کہنا ہے کہ پاک فضائیہ نے بروقت اور مؤثر کارروائی کرتے ہوئے بھارتی فضائیہ کے پانچ جدید جنگی طیارے، کئی ڈرونز اور متعدد پوسٹیں تباہ کر دیں، جس کے نتیجے میں بھارتی افواج شدید گھبراہٹ اور کنفیوژن کا شکار ہو گئیں۔
سیکورٹی حکام کے مطابق پاکستانی جواب کے بعد بھارتی فضائیہ نے دوبارہ ہوائی حملوں سے گریز کرنا شروع کر دیا ہے۔ مصدقہ اطلاعات کے مطابق، بھارت اب اسرائیلی ساختہ ہیراپ ڈرونز کے ذریعے پاکستان میں دوبارہ بزدلانہ کارروائیوں کی کوشش کر رہا ہے۔
تاہم پاک فوج کی مستعدی کے باعث اب تک 12 ہیراپ ڈرونز مار گرائے جا چکے ہیں۔ ذرائع کے مطابق، بھارت اپنی ناکامیوں کو چھپانے اور عوامی مایوسی کا رخ موڑنے کے لیے اشتعال انگیزی کا سہارا لے رہا ہے۔
پاک افواج کے ترجمان اداروں کا کہنا ہے کہ بھارت کی ہر ننگی جارحیت کا منہ توڑ جواب دیا گیا ہے اور آئندہ بھی دیا جاتا رہے گا۔
بھارت کے بزدلانہ حملے پر پاک فوج کا دندان شکن جواب: دشمن کے5 جدید طیارے، ڈرونز اور متعدد پوسٹیں تباہ
روزانہ مستند اور خصوصی خبریں حاصل کرنے کے لیے ڈیلی سب نیوز "آفیشل واٹس ایپ چینل" کو فالو کریں۔
