اسلام آبا د(آئی پی ایس) ریڑھی بانوں کی جانب سے دائر توہین عدالت کی درخواست میں سنگین الزامات سامنے آئے ہیں۔ درخواست گزاروں کے وکیل ایڈوکیٹ ایمان مزاری نے انکشاف کیا کہ ڈائریکٹر ڈی ایم اے ڈاکٹر انعم فاطمہ نے ریڑھی بانوں سے کہا کہ “یہ کیس ٹرانسفر کے پراسس میں ہے” اور مبینہ طور پر عدالتی حکم کو ماننے سے انکار کیا۔
اسلام آباد ہائیکورٹ کے جسٹس سردار اعجاز اسحاق خان نے کیس کی سماعت کی اور ڈائریکٹر ڈی ایم اے ایم سی آئی ڈاکٹر انعم فاطمہ کو ذاتی حیثیت میں کل طلب کرلیا۔ ایمان مزاری کے مطابق 24 اپریل کو عدالتی آرڈر کے باوجود ریڑھی بانوں کے خلاف کارروائی کی گئی، جس پر یہ توہین عدالت کی دوسری درخواست دائر کی گئی ہے۔
عدالت نے درخواست گزاروں کو ہدایت کی کہ وہ پٹیشن کے پیراگراف 5 میں دی گئی معلومات پر بیانِ حلفی جمع کرائیں۔ ایمان مزاری نے یقین دہانی کرائی کہ وہ بیان حلفی دینے کے لیے تیار ہیں۔ ان کے مطابق، ڈاکٹر انعم نے ریڑھی بانوں سے کہا کہ “آرڈر کو بھول جائیں” اور “میں اس آرڈر کو نہیں مانتی”۔
عدالت نے معاملے کی سماعت کل تک ملتوی کر دی ہے۔
