وزیر اعظم نے بجلی خریداری سے متعلق نئی 10سالہ منصوبہ بندی کی منظوری دیدی

اسلام آباد(سب نیوز) وفاقی وزیر پاور اویس لغاری نے کہا ہے کہ وزیر اعظم نے بجلی خریداری سے متعلق نئی 10 سالہ منصوبہ بندی آئی جی سیپ کی منظوری دیدی ہے جس کے تحت صارفین کو 4 ہزار 743 ارب روپے کی بچت ہو گی۔
وفاقی وزیر کے مطابق حکومت بجلی خریداری کے سنگل بائر ماڈل سے نکل رہی ہے ، بجلی خریداری اب مسابقتی بولی سے ہوگی۔اویس لغاری کا کہنا تھا کہ بجلی کی پیداوار اور خریداری سے متعلق کیے جانے والے اقدامات آئی پی پیز کے ساتھ معاہدوں پر ثانی کے اقدامات سے بھی اہم ہیں۔ان کا کہنا تھا کہ بجلی خریداری پلان کو 14ہزار میگاواٹ سے کم کرکے 7 ہزار میگاواٹ کر دیا ہے، صارفین کو بوجھ سے بچانے کیلئے 7 ہزار میگاواٹ بجلی خریداری کو منسوخ کیا گیا ہے۔