علیمہ خان کاعدالتی احکامات کی خلاف ورزی پر اظہار تشویش ، چیف جسٹس سے براہِ راست ملاقات کی خواہش

اسلام آبا د(آئی پی ایس)بانی پی ٹی آئی عمران خان کی ہمیشیرہ علیمہ خان نے اسلام آباد ہائیکورٹ میں صحافیوں سے بات کرتے ہوئے کہا کہ وہ چیف جسٹس سے خود بات کرنا چاہتی تھیں لیکن نیازی صاحب نے گفتگو کی۔ انہوں نے مزید کہا کہ “کل ہماری پٹیشن لگے گی تو میں چیف جسٹس سے بات کروں گی۔ ہم چیف جسٹس کو سپورٹ کریں گے تاکہ وہ ہمیں انصاف دلا سکیں۔”
علیمہ خان نے عدالتی احکامات پر عمل درآمد نہ ہونے پر خدشات کا اظہار کرتے ہوئے کہا کہ “ہمیں بہت خوف ہے اور عدالتی حکامات پر بالکل بھی عمل نہیں ہو رہا۔ اگر آج عدالتی احکامات کی توہین ہو رہی ہے تو کل ہر ادارے کی توہین ہوگی۔”
انہوں نے خبردار کیا کہ “جب جج اور ان کے احکامات کی توہین ہو گی تو پھر کسی پاکستانی کو انصاف نہیں ملے گا، اور اسی لیے ہم محرومی کا شکار ہیں۔”
علیمہ خان نے توہین عدالت کی سزا کا حوالہ دیتے ہوئے کہا کہ “توہین عدالت کی سزا چھ ماہ قید ہے۔”
گفتگو کے دوران انہوں نے مزید کہا کہ “جج صاحب پہلے ہی اٹھ کر جا چکے تھے، میں بات کرنا چاہ رہی تھی لیکن نیاز اللہ نیازی صاحب نے بات کی۔”