اسلام آباد : پاکستان مسلم لیگ نے پارٹی سربراہ اور سابق وزیراعظم چوہدری شجاعت حسین کی ہدایت پر مختلف شعبہ ہائے زندگی میں نمایاں کردار ادا کرنے والی خواتین کو “محترمہ فاطمہ جناح ایوارڈ ” اور یادگاری شیلڈ دینے کا فیصلہ کیا ہے،
گزشتہ روز مسلم لیگ شعبہ خواتین کی صدر مسز فرخ خان MNA کے گھر منعقدہ مشاورتی اجلاس میں پارٹی کے چیف آرگنائزر ڈاکٹر محمد مجد، مرکزی سیکرٹری اطلاعات مصطفیٰ ملک، صدر فیڈرل کیپٹل رضوان صادق،سابق MNA آمنہ سلیم،جنرل سیکرٹری شعبہ خواتین فوزیہ ناز،صدر ہیومن رائٹس ونگ انیلہ ایاز چوہدری،مونا بخاری، سابق صدر راولپنڈی ویمن چیمبر آف کامرس صبوحی حسین، نازلی شجاعت،رخسانہ سحر ،بشری فردوس رانجھا،زینت کنیز،روبینہ بٹ،ناٙلہ روبی چوہدری،فتانہ شاہ سمیت دیگر مسلم لیگی خواتین نے بھرپور شرکت کی،اس موقع پر پارٹی سربراہ چوہدری شجاعت حسین نے ٹیلی فونک گفتگو کرتے ہوئے کہا کہ خواتین کا معاشرے کی ترقی کے لیے اہم کردار ہے،مختلف شعبہ ہائے زندگی میں نمایاں کردار ادا کرنے خواتین کو معاشرے میں پزیرائی ملنی چاہیے، مسلم لیگ کے دور حکومت میں خواتین کی ترقی کے لیے انقلابی اقدامات ہوئے ۔خواتین پر ذمہ داری عائد ہوتی ہے کہ وہ معاشرہ کی اصلاح اور تشکیل میں بھرپور کردار ادا کریں ۔
انہوں نے مزید کہا کہ مسلمانوں کا ہر دن خواتین کے احترام کا دن ہوتا ہے ۔بطور ماں ، بہن ، بیٹی ، بیوی مسلمان عورت کو جو حقوق اور مرتبہ اسلام نے بخشے کسی اور مذہب اور معاشرے نے نہیں دیے ۔
مسلم لیگ شعبہ خواتین کی مرکزی صدر مسز فرخ خان MNA نے کہا کہ ہمیں فخر ہے کہ چوہدری شجاعت حسین نے خواتین کے ایشوز پر ہمیشہ جاندار سٹینڈ لیا۔پاکستانی خواتین باشعور ، مذہب سے لگاو رکھنے والی ہیں،اب وقت آگیا ہے کہ پاکستانی ماووں ، بہنوں اور بیٹیوں کو پاکستان کی ترقی میں بھرپور کردار ادا کرنا چاہیے، پاکستان مسلم لیگ کے مرکزی چیف آرگنائزر اور سابق وفاقی وزیر ڈاکٹر محمد امجد نے کہا کہ میں سمجھتا ہوں کہ خواتین میں ایوارڈ کی تقسیم سے انہیں آگے بڑھنے میں حوصلہ ملے گا ۔
انہوں نے کہا کہ کوشش کریں گے سیاسی وابستگی سے بالاتر ہو کر پاکستان بھر کی خواتین کی حوصلہ افزائی کریں۔ڈاکٹر محمد امجد نے اجلاس کو بتایا کہ پارٹی راہنماء مصطفیٰ ملک اور دیگر خواتین عہدے داروں سے مشاورت میں طے پایا ہے کہ یوم خواتین کی تقریب رمضان کے بعد منعقد کریں گے ہم چاہتے ہیں کہ رمضان کریم کا تقدس برقرار رہے اور عبادات میں خلل نہ پڑے۔رمضان کے بعد یوم خواتین کے حوالے سے بھرپور تقریب منعقد کریں گے۔
