اسلام آباد (آئی پی ایس )پولیو وائرس کے دوبارہ پھیلاو کو روکنے کے لیے ملک بھر کے 143اضلاع میں 7روزہ انسداد پولیو مہم کا آغاز کل سے ہوگا۔انسداد پولیو مہم کے دوران 5سال سے کم عمر کے 4کروڑ 47لاکھ سے زائد بچوں کو پولیو سے بچاو کے قطرے پلائے جائیں گے۔ یہ مہم حالیہ پولیو کیسز میں تشویشناک اضافے کے پیشِ نظرشروع کی گئی ہے
انسداد پولیو مہم 22دسمبر تک جاری رہے گی۔انسداد پولیو مہم میں پنجاب کے36اضلاع میں 2کروڑ 33 لاکھ، خیبرپختونخوا کے 36اضلاع میں 72لاکھ ، سندھ کے 30اضلاع میں 1کروڑ 6 لاکھ اور بلوچستان کے 36 اضلاع میں 26 لاکھ بچوں کو پولیو کے قطرے پلانے کا ہدف مقرر کیا گیا ہے ۔اس کے علاوہ اسلام آباد ، آزاد جموں کشمیر اور گلگت بلتستان کے5 اضلاع میں بھی 8لاکھ سے زائد بچوں کو پولیو ویکسین پلائی جائے گی۔ وزارت صحت نے تمام والدین پر زور دیا ہے کہ وہ پولیو کے خلاف ایک قوم کی حیثیت سے متحد ہو کر اپنے بچوں کی ویکسی نیشن کو یقینی بنائیں ۔والدین پولیو ورکرز کے ساتھ مکمل تعاون کریں اور ہر موقع پر اپنے بچوں کو پولیو سے بچا وکے قطرے لازمی پلوائیں کیونکہ فیصلہ آج کرنا ہے،اگر کل بچے کو چلنا ہے۔
