اسلام آباد (سب نیوز) اسلام آباد پولیس نے سابق وزیراعظم آزاد کشمیر و صدر استحکام پاکستان پارٹی سردار تنویر الیاس خان کے تینوں بیٹوں کو گرفتار کر لیا۔
تفصیلات کے مطابق اسلام آباد پولیس نے تھانہ کوہسار کی حدود سے مشیر آزادکشمیر حکومت سردار احمد صغیر کے بھائی سردار عفیف صغیر کو بھی گرفتار کر لیا، مشیر حکومت محکمہ جیل خانہ جات آزادکشمیر احمد صغیر خان کو بھی گرفتار کیے جانے کی اطلاعات ہیں۔ ذرائع کے مطابق سابق وزیراعظم ازاد کشمیر صدر استحکام پاکستان پارٹی سردار تنویر الیاس خان
کے بیٹوں اور سردار صغیر چغتائی مرحوم کے بیٹوں کے خلاف تھانہ مارگلہ میں شیراز خان نامی شخص کو ہراساں کرنے اور جان سے مارنے کی دھمکی دینے کا مقدمہ درج کیا گیا ہے۔
ترجمان چوہدری تنویر الیاس کے مطابق بے بنیاد مقدمات بنا کر سردار تنویر الیاس خان اور انکے فیملی ممبران کو پولیس تنگ کر رہی ہے، ملک کے نامور بزنس ٹائیکون اور سابق وزیراعظم آزادکشمیر اور انکی فیملی پر بے بنیاد مقدمات کا اندراج قابل مذمت ہے۔سابق وزیراعظم سردار تنویر الیاس خان کی گرفتاری کی خبریں بے بنیاد ہیں۔
