راولپنڈی(سب نیوز) چیئرمین تحریک جوانان پاکستان محمد عبداللہ گل نے کہا ہےکہ بشام حملے پر ملک دشمن عناصر کا پروپیگنڈا بے نقاب ہوگیا۔
حقائق منظر عام پر آ گئے ہیں کیونکہ پاکستان کی ترقی اور خوشحالی ملک دشمن عناصراورمخالفین کو ایک آنکھ نہں بھاتی اسی لئے ملک دشمن پروپیگینڈہ مسلسل پاکستان کی جڑوں کو کھوکھلا کرنے کے درپے ہیں ۔
صحافیوں سے بات چیت کرتے ہوئےانہوں نے کہا کہ حال ہی میں بشام کے علاقے میں دہشتگردوں کی بزدلانہ کارروائی کے نتیجے میں پانچ چینی انجینئرز ہلاک ہو گئے جس کے بعد ملک دشمن عناصر نے اس حساس موقعے سے فائدہ اٹھاتے ہوئے عوام میں حسب روایت مایوسی پھیلانا شروع کر دی اور سوشل میڈیا پر دعوے شروع کر دئیے کہ ڈیم پر چین کی جانب سے کام بند کر دیا گیا ہے جبکہ دوسری طرف چینی حکام کا کہنا ہے ڈیموں کے منصوبوں سے پاکستانی مزدوروں کو برطرف کرنے کی خبریں درست نہیں۔
تاہم بشام خودکش حملے میں پانچ چینی انجینئرز کی المناک ہلاکت کے باوجود چین نے تربیلا ڈیم توسیعی منصوبے پر دوبارہ کام شروع کر دیا ہے۔انہو ں نے کہا کہ اس سے پہلے 26 مارچ کو جاری سرکلر میں کمپنی نے کہا تھا کہ عارضی کام بندش کے باوجود ملازمین کو ان کے جائز قانونی حقوق ملیں گے، کمپنی نے ملازمین کو نکالنے کی خبریں مسترد کی ہیں جبکہ چینی وزارت خارجہ کے ایک بیان میں پاکستان کے ساتھ مل کر اعلیٰ معیار کی ترقی کو جاری رکھنے پر زور دیتے ہوئے اس عزم کا اعادہ کیا گیا ہے۔
حملے کے بعد پاکستان میں ایک ہائیڈرو پاور پلانٹ میں سول ورکس اور ملازمین کی برطرفی کا الزام لگانے والی ہندوستانی میڈیا کی رپورٹوں کو مسترد کرتے ہوئے، چینی تعمیراتی کمپنی کے دفتری آرڈر نے ایسے دعوؤں کو یکسر مسترد کر دیا ہے۔عبداللہ حمید گل نے کہا کہ پاکستان میں چینی سفارتخانے اور قونصلیٹ جنرلز دونوں نے بھی دہشت گرد حملے کی شدید مذمت کی اور چینی وزارت خارجہ کے ترجمان لین جیان نے زور دے کر کہا کہ پاکستان اور چین دہشت گردوں کو ان کے اقدامات کے لیے جوابدہ ٹھہرانے کا عزم اور صلاحیت رکھتے ہی۔ انہوں نے اس بات پر زور دیتے ہوئے کہا کہ پاک چین تعاون کو نقصان پہنچانے کی کوئی بھی کوشش بے سود ہو گی۔
چینی وزارت خارجہ کے ترجمان نے دہشت گردی پر چین کے موقف کو بھی دہراتے ہوئے کہا کہ “دہشت گردی تمام انسانوں کا مشترکہ دشمن ہے، اور یہ عالمی برادری کی مشترکہ ذمہ داری ہے کہ وہ دہشت گردی کا مقابلہ کرے اور اس طرح کے سانحات کے اعادہ کو روکے۔انہو ں نے کہاتربیلا ڈیم کے توسیعی منصوبے پر کام کا دوبارہ آغاز، مشکلات کے باوجود، پاکستان کے ساتھ بنیادی ڈھانچے کی ترقی اور اقتصادی تعاون کو فروغ دینے کے لیے چین کے غیر متزلزل عزم کی نشاندہی کرتا ہے۔
آخر میں عبداللہ گل نےیوں چینی حکام کی جانب سے جاری کردہ بیانات اور داسو کے مقام پر چینی کمپنیوں کا دوبارہ سے کام شروع کرنا اور تربیلا ڈیم کے توسیعی منصوبے پر کام ان تمام ملک دشمن عناصر کے منہ پر طمانچہ اور ان کی شکست ہے جو چند دن پہلے تک اس افسوس ناک واقعے پر اپنی جھوٹی سیاست چمکانے میں مصروف تھے۔
