اسلام آباد (آئی پی ایس )وفاقی حکومت نے عید الفطر سے قبل عوام پر پٹرول بم گرا دیا ،پٹرول کی قیمت میں 9روپے 66پیسے کا بڑا اضافہ کر دیا گیا ہے ، اضافے کے بعد پٹرول کی فی لیٹر قیمت 289روپے 41پیسے فی لیٹر ہو گئی ہے جبکہ ڈیزل 3روپے 32پیسے فی لیٹر سستا کر دیا گیا ہے ،کمی کے بعد ڈیزل کی نئی قیمت 282روپے 24پیسے فی لیٹر مقرر کی گئی ،لائٹ ڈیزل اور مٹی کے تیل کی قیمتیں برقرار رکھی گئی ہیں ، قیمتوں میں اطلاق یکم اپریل سے 15اپریل تک ہو گا ۔
تفصیلات کے مطابق عیدالفطر سے قبل عوام کو مہنگائی عیدی میں دیتے ہوئے پیٹرول کی قیمت میں ہوشربا اضافہ کردیا گیا ہے ۔حکومت کی جانب سے آئندہ 15 روز کیلئے پیٹرول کی فی لیٹر قیمت میں 9 روپے 66 پیسے اضافہ کردیا گیا، اور پیٹرول کی فی لیٹر نئی قیمت 289 روپے 41 پیسے مقرر کردی گئی جو کہ پہلے 279 روپے 75 پیسے تھی۔
فنانس ڈویژن کی جانب سے جاری نوٹیفکیشن کے مطابق ڈیزل کی فی لیٹر قیمت میں آئندہ 15 روز کیلئے 3 روپے 32 پیسے کی کمی کی گئی اور نئی قیمت 282 روپے 24 پیسے فی لیٹر مقرر کردی گئی جو کہ پہلے 285 روپے 56 پیسے تھی۔وزارت خزانہ کے مطابق نئی قیمتوں کا اطلاق رات 12 بجے سے آئندہ 15 روز کیلئے ہوگا۔اس سے پہلے یہ خدشہ بھی ظاہر کیا جا رہا تھا کہ حکومت نے اگر ائی ایم ایف کے مطالبے پر پیٹرول پر 18 فیصد جی ایس ٹی لگا دیا تو پیٹرول کی قیمت میں 50 روپے تک کا اضافہ ہو سکتا ہے۔
