وزیر خزانہ شوکت ترین کی زیر صدارت اہم اجلاس ،وفاقی حکومت کا کامیاب جوان پروگرام میں بڑی تبدیلیوں کا فیصلہ

اسلام آباد،وفاقی حکومت کا کامیاب جوان پروگرام میں بڑی تبدیلیوں کا فیصلہ،وزیر خزانہ شوکت ترین کی زیر صدارت پروگرام سے متعلق اہم اجلاس ہوا جس میں گورنر اسٹیٹ بینک، معاون خصوصی عثمان ڈار اور معاشی ماہرین نے شرکت کی۔اجلاس میں کامیاب جوان پروگرام کو روزگار کی فراہمی کیلئے سب سے بڑا ٹول بنانے کی حکمت عملی پر غورکیا گیا اورملکی تاریخ میں پہلی بار نوجوانوں کیلئے قرض کی حد کو 5 کروڑ روپے تک بڑھانے کا فیصلہ کیا گیا ۔وزیر خزانہ نے رقم کی تقسیم کے عمل میں ہنگامی بنیادوں پر تیزی لانے کا عندیہ دے دیا،پروگرام کے تحت رقم کی تقسیم کیلئے 4 مختلف کیٹیگریز طے کر دی گئیں،پہلی کیٹیگری 1 سے 5 لاکھ روپے تک ہو گی، مائیکرو فنانسنگ کی جائیگی۔اجلاس میں فیصلہ کیا گیا کہ گاوں،دیہات اور یونین کونسلز کی سطح پر رقم کی تقسیم ہو گی۔دوسری کیٹیگری میں رقم 10 سے بڑھا کر 20 لاکھ روپے کر دی گئی،10 کی بجائے 20 لاکھ روپے کی رقم بغیر سکیورٹی کے فراہم کی جائیگی،تیسری کیٹیگری میں رقم کی حد 20 لاکھ سے ڈھائی کروڑ روپے تک ہو گی،چوتھی کیٹیگری میں 5 کروڑ روپے تک کا قرض فراہم کیا جائیگا اس حوالے سے 15 جون تک وفاقی کابینہ اور ای سی سی سے تبدیلیوں کی منظوری لی جائیگی،اسی سال بجٹ میں رقم مختص کر دی جائیگی۔ اجلاس میں نوجوانوں میں کم از کم 100 ارب روپے کی رقم فوری تقسیم کرنے کافیصلہ کیا گیا ۔اس موقع پر وزیر خزانہ شوکت ترین نے کہا کہ کامیاب جوان ملکی معیشت اور انڈسٹری کیلئے انقلابی پروگرام ثابت ہو گا،منصوبہ زراعت اور ایس ایم ای سیکٹر کو پاوں پر کھڑا کر سکے گا۔انہوں نے کہا کہ پروگرام میں شامل بینک قرض کی تقسیم کا عمل فوری تیز کر دیں۔پی ٹی آئی رہنما عثمان ڈار نے کہا کہ ینگ انٹرپینیورز کی مکمل حوصلہ افزائی کیلئے بھی بڑے اقدامات اٹھائے گئے ہیں ،زراعت، ایس ایم ایز، سروس سیکٹر اور مینوفیکچرنگ انڈسٹری کیلئے زبردست پیکج تیار کیا ہے۔انہوں نے کہا کہ کم از کم 10 لاکھ نوجوانوں کو روزگار کا موقع دینا چاہتے ہیں، آج ہونے والے فیصلے نوجوانوں کے مطالبات کو مد نظر رکھ کر کئے گئے ہیں۔