وزیر اعظم کل سعودی عرب کے 3 روزہ دورے پر روانہ ہوں گے

اسلام آباد،وزیر اعظم عمران خان کل (جمعہ )کوسعودی عرب کے 3 روزہ دورے پر روانہ ہوں گے۔ وزیراعظم عمران خان سعودی ولی عہد محمد بن سلمان کی دعوت پرسعودی عرب کا دورہ کر رہے ہیں، وزیر خارجہ شاہ محمود قریشی اور کابینہ اراکین سمیت اعلی سطحی وفد بھی وزیراعظم کے ہمراہ ہوگا۔ترجمان دفتر خارجہ زاہد حفیظ کے مطابق دورے کے دوران علاقائی اور باہمی تعاون کے امور پر تبادلہ خیال ہوگا، وزیراعظم معیشت، توانائی، تجارت، سرمایہ کاری پر سعودی قیادت سے بات کریں گے۔انہوں نے کہا کہ وزیر اعظم کی سعودی قیادت سے مشاورت میں دوطرفہ تعاون کے شعبوں کو شامل کیا جائے گا، دونوں فریق باہمی دلچسپی کے علاقائی اور بین الاقوامی امور پر بھی تبادلہ خیال کریں گے۔زاہد حفیظ نے کہا کہ دورے کے دوران متعدد دو طرفہ معاہدوں پر دستخط کیے جائیں گے، وزیر اعظم اسلامی تعاون تنظیم کے سیکریٹری جنرل سے بھی ملاقات کریں گے۔ترجمان دفتر خارجہ نے بتایا کہ وزیر اعظم عمران خان جدہ میں پاکستانی کمیونٹی کے ساتھ بھی بات چیت کریں گے۔