اناطولیہ:بین الاقوامی فلائٹ ٹیکٹیکل مشق، اناطولین ایگل 2023 کی افتتاحی تقریب ترکیہ کے شہر قونیا میں منعقد ہوئی۔ پاک فضائیہ کے ایف-16 لڑاکا طیاروں کے ساتھ ساتھ ایئر اینڈ گرانڈ عملہ بھی مشق میں شریک ہے۔
اناطولین ایگل ایک سالانہ مشق ہے جس کی میزبانی ترک فضائیہ کی جانب سے کی جا رہی ہے۔ یہ مشق دنیا کی سب سے بڑی اور پیچیدہ مشترکہ فضائی مشقوں میں سے ایک ہے، جس کا مقصد شرکا کے مابین باہمی تعاون کو فروغ دینے کے ساتھ ساتھ مشترکہ تربیت کے مواقع فراہم کرنا ہے۔ یہ مشق ایک حقیقی فضائی جنگ کے پس منظر میں شریک ہونے والی فضائی افواج کو اپنی آپریشنل تیاریوں کو جانچنے کا ایک بہترین موقع فراہم کرتی ہے۔ مشق کے ساتویں ایڈیشن میں پاکستان اور ترکیہ کے علاوہ دیگر پانچ ممالک، بشمول آذربائیجان، قطر، سعودی عرب، متحدہ عرب امارات اور برطانیہ کی فضائی افواج حصہ لے رہی ہیں۔
چیلنجز سے بھرپور عصر حاضر کی تزویراتی صورتحال اور سیکورٹی کے ماحول میں بڑھتی ہوئی پیچیدگیوں کے پیش نظر اس طرح کی فضائی مشقیں پاک فضائیہ کو دوست ممالک کے ساتھ مشترکہ آپریشنز کی صلاحیت کو بہتر بنانے کے مواقع فراہم کرتی ہیں۔
