لاہور: چیئرمین تحریک انصاف عمران خان پیشی کے لیے زمان پارک سے لاہور ہائی کورٹ پہنچ کر کمرہ عدالت میں پیش ہوگئے ہیں۔
عمران خان نے 9 مقدمات میں حفاظتی ضمانت کی درخواستیں لاہور ہائیکورٹ میں دائر کیں۔ انہوں نے زمان پارک سے لاہور ہائیکورٹ تک جانے کے لیے سیکیورٹی کی بھی درخواست دائر کی جس پر عمل درآمد ہورہا ہے۔ تمام درخواستوں پر آج ہی سماعت کی جائے۔
عمران خان لاہور ہائی کورٹ پہنچ گئے۔ رجسٹرار آفس نے ان کی گاڑی عدالت کے احاطے میں لانے کی اجازت دے دی۔ عمران خان کے ساتھ سینئر رہنما اور کارکنوں کی بڑی تعداد موجود ہے جب کہ پولیس نے انہیں سیکیورٹی دے رکھی ہے۔ ان کی گاڑی میں جیمر نہیں تھا جس پر پنجاب پولیس کی ایک گاڑی ان کے ساتھ موجود ہے جس میں جمیر لگا ہوا ہے۔
عدالت نے عمران خان کو عدالت میں پہنچنے کیلیے ساڑھے پانچ بجے کا وقت دیا تاہم راستے بند ہونے اور کارکنان کی بڑی تعداد میں شرکت کی وجہ سے وہ سوا چھ بجے تک کمرہ عدالت میں پیش نہیں ہوئے۔
عمران خان کے وکلا نے عدالت کو آگاہ کیا کہ پی ایس ایل میچز، راستوں کی بندش اور کارکنان کے رش کی وجہ سے کمرہ عدالت پہنچنے میں تاخیر ہوئی۔ جسٹس طارق سلیم شیخ اور جسٹس فاروق حیدر کچھ دیر بعد سماعت کریں گے۔ درخواست عمران خان کی جانب سے دائر کی گئی۔ اسد عمر، عمر ایوب سمیت دیگر رہنما بھی عدالت پہنچ گئے ہیں۔
