اسلام آباد، (سب نیوز): پاکستان میں پرتگال کے سفیر پاؤلو ڈومنگیوس نے اسلام آباد میں خیبر پختونخوا اسمبلی کے اسپیکر بابر سلیم سواتی سے ملاقات کی۔
ملاقات کے دوران پاکستان اور پرتگال کے درمیان دوطرفہ تعلقات کو مزید مضبوط بنانے کے طریقوں پر تبادلہ خیال کیا گیا، جبکہ پارلیمانی سفارت کاری کے ذریعے خیبر پختونخوا کے ساتھ روابط بڑھانے اور ادارہ جاتی، اقتصادی، تعلیمی اور ثقافتی تعلقات کو فروغ دینے پر خصوصی توجہ دی گئی۔
فریقین نے باہمی تعاون کے لیے مختلف ممکنہ شعبوں کی نشاندہی بھی کی، جن میں سیاحت، قابلِ تجدید توانائی، آبی وسائل کا انتظام، زراعت اور زرعی کاروبار، تعلیم و فنی تربیت، ڈیجیٹل ٹیکنالوجی، انفراسٹرکچر اور قدرتی وسائل کی پائیدار ترقی شامل ہیں۔
پرتگال کے سفارتخانے کی جانب سے اس عزم کا اظہار کیا گیا کہ پاکستان اور پرتگال کے تعلقات میں صوبائی اور پارلیمانی روابط کو مزید مستحکم کرنے کے لیے کوششیں جاری رکھی جائیں گی، تاکہ دونوں ممالک کے درمیان تعاون کے نئے مواقع پیدا کیے جا سکیں اور باہمی روابط کو مزید وسعت دی جا سکے۔
