اسلام آباد(آئی پی ایس) جمہوریہ قازقستان کے سفیر، عزت مآب مسٹر یرژان کستافن نے اسلام آباد میں وفاقی وزیر برائے موسمیاتی تبدیلی و ماحولیاتی ہم آہنگی، ڈاکٹر مصدق ملک سے ان کے دفتر میں ملاقات کی۔
ملاقات کے دوران سفیر نے جمہوریہ قازقستان کے صدر، عزت مآب مسٹر قاسم جومارت توکایف اور ان کے وفد کے حالیہ دورۂ پاکستان کے موقع پر دی گئی پرتپاک میزبانی اور مہمان نوازی پر اظہارِ تشکر کیا۔ انہوں نے پاکستان اور قازقستان کے درمیان بڑھتے ہوئے برادرانہ تعلقات پر اطمینان کا اظہار کیا۔ سفیر نے ڈاکٹر مصدق ملک کو اپریل میں آستانہ، قازقستان میں منعقد ہونے والی علاقائی ماحولیاتی سربراہی کانفرنس میں شرکت کی دعوت بھی دی۔
ڈاکٹر مصدق ملک نے دعوت کا خیرمقدم کرتے ہوئے کہا کہ پاکستان اور قازقستان کے درمیان مضبوط تاریخی اور ثقافتی روابط موجود ہیں۔ انہوں نے اس امر پر زور دیا کہ دونوں ممالک ایک دوسرے کے تجربات سے بھرپور استفادہ کر سکتے ہیں اور باہمی تعاون اور تجارت کو نہ صرف دوطرفہ سطح پر بلکہ وسطی ایشیائی خطے کے ساتھ بھی وسعت دی جانی چاہیے۔
فریقین نے قازقستان کے صدر کے دورۂ پاکستان کے دوران طے پانے والے مفاہمتی یادداشت (ایم او یو) پر عملی پیش رفت کے امور پر تبادلہ خیال کیا اور مصنوعی ذہانت، مالیاتی ٹیکنالوجی اور الیکٹرانک طرزِ حکمرانی کے شعبوں میں ممکنہ تعاون اور مشترکہ منصوبوں کے امکانات کا جائزہ لیا۔
ملاقات میں پانی کی قلت اور موسمیاتی تبدیلی جیسے اہم ماحولیاتی چیلنجز پر بھی گفتگو کی گئی، اور ماحولیاتی تحفظ اور پائیدار ترقی کے لیے تعاون کو مزید مضبوط بنانے پر اتفاق کیا گیا۔
