فیشن ڈیزائننگ یونیورسٹی میں بڑا سکینڈل؟ سینیٹ قائمہ کمیٹی کا سخت ایکشن

اسلام آباد: (آئی پی ایس) سینیٹ کی قائمہ کمیٹی برائے تعلیم کا اجلاس چیئرپرسن بشریٰ انجم بٹ کی زیرِ صدارت منعقد ہوا جس میں انسٹیٹیوٹ آف فیشن ڈیزائننگ کی وائس چانسلر سے متعلق معاملات زیرِ غور آئے۔
اجلاس کے دوران عبوری وائس چانسلر طیبہ بھی شریک ہوئیں تاہم چیئرپرسن کمیٹی نے انہیں مخاطب کرتے ہوئے کہا کہ انہیں اجلاس میں بلایا نہیں گیا اور ان کی موجودگی ضروری نہیں۔
چیئرپرسن بشریٰ انجم بٹ نے کہا کہ کمیٹی کے پاس وائس چانسلر کے خلاف اختیارات کے غلط استعمال اور مالی بے ضابطگیوں کے حوالے سے کافی شواہد موجود ہیں۔ ان کا کہنا تھا کہ متعلقہ خاتون گزشتہ 25 برس سے بطور وی سی تعینات ہیں اور ان کے خلاف انکوائری بھی جاری ہے۔
چیئرپرسن نے مزید کہا کہ انکوائری کے باوجود طیبہ کو عبوری وائس چانسلر تعینات کیا گیا، جبکہ انہیں دو کروڑ روپے سے زائد کے انکریمنٹس بھی دیے گئے۔ انہوں نے الزام لگایا کہ وزارت کی جانب سے وی سی کو نوازا گیا جس سے پارلیمان کی تضحیک ہوئی۔
بشریٰ انجم بٹ کا کہنا تھا کہ اگر وزیر تعلیم کمیٹی کو عزت نہیں دیں گے تو سیکریٹری تعلیم سے بھی تعاون کی توقع نہیں کی جا سکتی۔ انہوں نے کہا کہ جب تک وائس چانسلر کو عہدے سے نہیں ہٹایا جاتا شفاف انکوائری ممکن نہیں ہوگی۔ ان کے مطابق اجلاس میں بولنے والوں کے خلاف بھی وی سی کی جانب سے کیس دائر کیا گیا ہے۔
چیئرپرسن نے کہا کہ عبوری وی سی کی تعیناتی کے لیے منظوری حاصل نہیں کی گئی اور وزیر تعلیم نے یہ ایجنڈا ایوانِ صدر کو بھی نہیں بھجوایا۔ اس موقع پر چیئرمین ہائر ایجوکیشن کمیشن نے کہا کہ صدرِ مملکت کی منظوری کے بغیر تعیناتی ممکن نہیں۔
اجلاس میں سینیٹر خالدہ اطیب نے انکشاف کیا کہ کراچی میں پریسٹن یونیورسٹی تسلیم شدہ نہیں ہے۔
اجلاس کے اختتام پر سینیٹ قائمہ کمیٹی نے ملک بھر کی جامعات کے دورے کرنے کا فیصلہ بھی کیا۔