اسلام آباد(آئی پی ایس) وفاقی وزیر مذہبی امور و بین المذاہب ہم آہنگی سردار محمد یوسف نے یومِ یکجہتی کشمیر کے موقع پر اپنے خصوصی پیغام میں کہا ہے کہ یومِ یکجہتی کشمیر محض ایک دن نہیں بلکہ مظلوم کشمیری عوام کے ساتھ عزم کی تجدید اور یاد دہانی ہے۔
انہوں نے کہا کہ مقبوضہ جموں و کشمیر کے مظلوم مسلمان بھائیوں اور بہنوں کی جدوجہدِ آزادی کو پاکستان کی مکمل اور غیر مشروط حمایت حاصل ہے۔ سردار محمد یوسف کے مطابق 1947 سے جاری تنازعہ کشمیر میں بھارت اقوام متحدہ کی قراردادوں کو مسلسل نظرانداز کرتے ہوئے کشمیر پر قابض ہے، جس کے نتیجے میں اب تک لاکھوں کشمیری اپنی جانوں سے ہاتھ دھو بیٹھے اور انسانی حقوق کی سنگین خلاف ورزیاں ہو رہی ہیں۔
وفاقی وزیر نے بھارتی قابض افواج کی جانب سے پیلٹ گنز کے استعمال، غیر قانونی حراستوں، جبری گمشدگیوں، تشدد، جنسی زیادتیوں اور طویل کرفیو جیسے مظالم کی شدید مذمت کرتے ہوئے کہا کہ یہ اقدامات نہ صرف بین الاقوامی قوانین کی کھلی خلاف ورزی ہیں بلکہ انسانیت کے خلاف سنگین جرائم کے زمرے میں آتے ہیں۔
سردار محمد یوسف نے عالمی برادری، اقوام متحدہ اور انسانی حقوق کی تنظیموں سے مطالبہ کیا کہ وہ کشمیر کے مسئلے کا پرامن اور منصفانہ حل یقینی بنائیں، کیونکہ اقوام متحدہ کی قراردادیں کشمیری عوام کو حقِ خودارادیت کی ضمانت دیتی ہیں۔
انہوں نے کہا کہ حکومتِ پاکستان نے حالیہ برسوں میں او آئی سی، اقوام متحدہ کی انسانی حقوق کونسل اور دیگر عالمی فورمز پر کشمیر کے مقدمے کو مضبوطی سے اجاگر کیا ہے اور پاکستان آئندہ بھی کشمیری عوام کی اخلاقی، سفارتی، سیاسی اور انسانی امداد کی بھرپور حمایت جاری رکھے گا۔
وفاقی وزیر نے اس بات پر زور دیا کہ پاکستان میں مختلف مذاہب اور مسالک سے تعلق رکھنے والے افراد یکجہتی کے ساتھ کشمیر کی آزادی کی جدوجہد میں شریک ہیں اور آج کا دن ہمیں یاد دلاتا ہے کہ اتحاد ہی ہماری اصل طاقت ہے۔
انہوں نے بتایا کہ یومِ یکجہتی کشمیر کے موقع پر ملک بھر میں ریلیاں، سیمینارز، دعائیہ تقریبات اور آگاہی مہمات کا انعقاد کیا جا رہا ہے تاکہ عالمی برادری کو مقبوضہ کشمیر کی سنگین صورتحال سے آگاہ کیا جا سکے۔
آخر میں سردار محمد یوسف نے امید ظاہر کی کہ وہ دن دور نہیں جب کشمیر آزادی حاصل کرے گا، ظلم کا خاتمہ ہوگا اور کشمیری عوام اپنی خواہشات کے مطابق مستقبل کا فیصلہ کر سکیں گے۔
