اسلام آباد (سب نیوز )وفاقی کابینہ کے اجلاس میں اقتصادی تعاون کمیٹی کے 3 فروری 2026 کے منعقدہ اجلاس میں کئے گئے فیصلوں کی اصولی منظوری دی گئی ۔وفاقی کابینہ نے ریاستی ملکیتی ادراوں سے متعلقہ کابینہ کمیٹی کے 9 جنوری 2026 کے منعقدہ اجلاس میں کئے گئے فیصلوں کی بھی منظوری دی۔علاوہ ازیں وفاقی کابینہ نے CCLC کے 29 جنوری2026 کے منعقدہ اجلاس میں کیئے گئے فیصلوں کی بھی اصولی منظوری دی۔
وزیراعظم محمد شہباز شریف کی زیر صدارت وفاقی کابینہ کا اجلاس اسلام آباد میں منعقد ہوا۔ جس میں اقتصادی تعاون کمیٹی کے 3 فروری، ریاستی ملکیتی ادراوں سے متعلقہ کابینہ کمیٹی کے 9 جنوری اور (قانونی امور) قانون سازی کے تصفیہ سے متعلقہ کابینہ کمیٹی کے 29 جنوری کے منعقدہ اجلاسوں میں کیئے گئے فیصلوں کی اصولی منظوری دی۔
اس موقع پر وزیر اعظم نے کابینہ ارکان سے خطاب کرتے ہوئے بلوچستان میں حالیہ دہشت گردی کے تناظر میں ملک میں دہشت گردی کے مکمل خاتمے کے عزم کا اعادہ کیا۔ وزیراعظم نے یوم یکجہتی کشمیر پر حکومت پاکستان اور پوری قوم کے جانب سے کشمیریوں کے لئے یکجہتی کا پیغام دیا۔
وزیراعظم نے وزیراعلی خیبر پختون خوا سے ملاقات کا ذکر کرتے ہوئے وفاق اور صوبے کے درمیان باہمی تعاون اور ہم آہنگی سے ملکی ترقی و خوشحالی کے لیے کام کرنے کے حکومتی عزم کا بھی اعادہ کیا۔
وزیراعظم نے وفاقی کابینہ کو بنگلہ دیش سے یکجہتی کے اظہار میں ٹی ٹونٹی ورلڈ کپ میں بھارت سے دو طرفہ میچ نہ کھیلنے کے فیصلے سے بھی آگاہ کیا۔ علاوہ ازیں وزیراعظم نے وفاقی کابینہ کو بردار ممالک سے پاکستان کے بہترین سفارتی تعلقات بالخصوص قازقستان کے صدر کے حالیہ دورے اور ازبک صدر کے آئندہ دورے سے متعلق بھی آگاہ کیا۔
