لیبیا کے سفیر کی کامسٹیک کے کوآرڈینیٹر جنرل سے ملاقات ، دو طرفہ سائنسی تعاون بڑھانے پر اتفاق

اسلام آباد(سب نیوز)پاکستان میں لیبیا کے سفیر معمر عبدالمطلب نے اسلامی تعاون تنظیم کے سائنسی و تکنیکی ادارے کامسٹیک کے کوآرڈینٹر جنرل پروفیسر ڈاکٹر محمد اقبال چوہدری سے اسلام آباد میں موجود لیبیا کے سفارت خانے میں ملاقات کی۔ ملاقات میں سائنس، تحقیق اور ٹیکنالوجی کے شعبوں میں باہمی تعاون کے فروغ پر تفصیلی گفتگو ہوئی۔
فریقین نے لیبیا اور اسلامی تعاون تنظیم کے رکن و مبصر ممالک کے درمیان سائنسی اشتراک کو مضبوط بنانے کے طریقہ کار پر تبادلہ خیال کیا۔ اس موقع پر کامسٹیکلیبیا پروگرام کے آغاز پر اتفاق کیا گیا، جس کا مقصد تحقیق، جدت اور استعداد سازی کو فروغ دینا ہے۔پروگرام کے تحت طرابلس کی جامعہ میں مصنوعی ذہانت پر تحقیق و ترقی کا مرکز قائم کیا جائے گا، جہاں صحت، ماحولیات اور زراعت سمیت مختلف شعبوں میں جدید تحقیق اور تربیت فراہم کی جائے گی۔ کامسٹیک ہر سال پچاس طبی کارکنان، جن میں نرسیں، لیبارٹری کے عملے کی تربیت شامل ہے، کی معاونت کریگا۔
خوراک کے تحفظ اور زراعت کے شعبے میں محققین کی تربیت کے لیے جدید ٹیکنالوجی کے استعمال پر مبنی پروگرام شروع کیے جائیں گے، جن میں جغرافیائی نقشہ سازی، جدید زرعی نظم و نسق اور باہم مربوط آلات شامل ہوں گے، تاکہ زرعی پیداوار میں اضافہ اور لیبیا کے غذائی تحفظ کے اہداف حاصل کیے جا سکیں۔قدرتی آفات سے نمٹنے کے لیے استعداد سازی اور تربیتی پروگرام بھی شروع کیے جائیں گے، جن میں آفات سے بچاو، صحت کی ہنگامی صورتحال اور موسمیاتی خطرات پر خصوصی توجہ دی جائے گی۔ اس کے علاوہ لیبیا کی جامعات کے وائس چانسلرز اور صدور کے لیے تعلیمی فورم کا انعقاد کیا جائے گا تاکہ جامعات کے درمیان تعاون کو فروغ دیا جا سکے۔
ملاقات میں مشرقِ وسطی اور شمالی افریقہ کے لیے کامسٹیک کے علاقائی رابطہ دفتر کے قیام پر بھی اتفاق کیا گیا، جسے لیبیائی حکومت کی حمایت حاصل ہوگی۔کامسٹیک کے کوآرڈینیٹر جنرل نے لیبیا کی سائنسی اور تکنیکی ترقی کے لیے بھرپور تعاون کی یقین دہانی کرائی، جبکہ سفیرِ لیبیا نے کہا کہ یہ شراکت داری لیبیا کے محققین اور ماہرین کے لیے جدید سائنسی میدانوں میں نئے مواقع پیدا کرے گی۔