قومی ایئرلائن کی پرانی ساکھ بحال کرینگے،عارف حبیب کا پی آئی اے میں مزید روزگار پیدا کرنے اور طیاروں کی تعداد بڑھانے کا عندیہ

اسلام آباد(سب نیوز)معروف کاروباری شخصیت عارف حبیب نے پی آئی اے خریدنے کے بعد مزید روزگار پیدا کرنے اور طیاروں کی تعداد بڑھانے کا عندیہ دے دیا۔
عارف حبیب کا میڈیا سے خصوصی گفتگو میں کہنا تھا کہ میراخیال ہے کہ آج پاکستان کی جیت ہوئی ہے، الحمد اللہ، اس سے ملک میں سرمایہ کاری کو فروغ ملے گا، پی آئی اے ہمارا قومی ادارہ ہے،الحمد اللہ پی آئی اے نے اچھے دن دیکھے ہیں، پی آئی اے دنیا میں دوسری بہترین ایئر لائنز رہی ہے۔
انہوں نے کہا کہ پی آئی اے کے ملازمین بہت قابل ہیں، پی آئی اے کے پاس 18 طیارے ہیں،14آپریشنل ہیں، پہلے مرحلے میں پی آئی اے کے طیاروں کی تعداد38 کریں گے، دوسرے مرحلے میں پی آئی اے کے طیاروں کی تعداد 65 کریں گے۔عارف حبیب کا کہنا تھا کہ بعد میں طلب کے مطابق پی آئی اے کے طیاروں کی تعداد بڑھائیں گے، ایئر لائن کے عملے کو اعتماد دیں گے،ان کی مہارت کا فائدہ اٹھائیں گے، پی آئی اے کے تجربہ کار اور ماہرین کی خدمات جاری رکھیں گے،فاطمہ فرٹیلائزرز گروپ کے ہمارے ساتھ شامل ہونے کے امکانات ہیں۔