وزیراعظم کی کیش لیس معیشت کے فروغ کیلئے کوششیں مزید تیز کرنے کی ہدایت

اسلام آباد(سب نیوز)وزیراعظم نے ملک میں کیش لیس معیشت کے فروغ کی کوششوں کو مزید تیز کرنے کی ہدایت کی ہے۔
راست کے بورڈ ممبران سے ملاقات میں وزیراعظم شہباز شریف نے نئی ذمے داریاں سنبھالنے والوں کو مبارک باد پیش کی اور کہا کہ امید ہے قومی اہمیت کے حامل اس ادارے کو مزید بہتر انداز میں چلایا جائے گا۔وزیراعظم نے کہا کہ کیش لیس معیشت اور مالی شمولیت کے فروغ میںراست کا کلیدی کردار ہے۔ ملک بھر کے کاروباری افراد کو راست پلیٹ فارم کے استعمال کی ترغیب دینے کی کوششیں مزید تیز کی جائیں۔
اجلاس میں بورڈ ارکان کی جانب سے راست کی کارکردگی پر وزیراعظم کو تفصیلی بریفنگ دی گئی اور بتایا گیا کہ راست کے اجرا سے اب تک تقریبا 80 کھرب روپے کی 3 ارب سے زائد ٹرانزیکشنز مکمل ہو چکی ہیں۔ راست کے صارفین کی تعداد 48 ملین سے تجاوز کر چکی ہے جب کہ ملک بھر کے 53 مالیاتی ادارے راست کا حصہ ہیں۔بریفنگ میں مزید بتایا گیا کہ راست اسٹیٹ بینک آف پاکستان کا ادارہ ہے، تاہم ایک ممبر کے علاوہ تمام بورڈ ممبران نجی شعبے سے وسیع تجربے کی بنیاد پر منتخب کیے گئے ہیں۔ ملک بھر میں تمام جی 2 بی اور بی 2 جی ادائیگیوں کو راست پر منتقل کرنا ادارے کا وژن ہے۔ راست کے ذریعے ہر فرد کو محفوظ اور قابلِ اعتماد ڈیجیٹل ادائیگی کا پلیٹ فارم فراہم کیا گیا ہے۔
اجلاس میں وفاقی وزیر خزانہ محمد اورنگزیب، وزیر اطلاعات عطا تارڑ، وزیر اقتصادی امور احد خان چیمہ، وزیر انفارمیشن ٹیکنالوجی شزا فاطمہ خواجہ، وزیرِ مملکت برائے خزانہ بلال اظہر کیانی، گورنر اسٹیٹ بینک، راست بورڈ کے ممبران ، سی ای او اور اعلی سرکاری افسران نے شرکت کی۔