بیجنگ :آئس لینڈ کی صدر ہاڈرا تھامس ڈوٹیر نے چین کے دورے کے دوران چائنا میڈیا گروپ کو دیئے گئے ایک خصوصی انٹرویو میں کہا کہ عالمی خواتین سمٹ کا انعقاد نہایت اہمیت کا حامل ہے۔ہفتہ کے روز انہوں نے کہا کہ صنفی مساوات دنیا کی معیشت اور سماجی ترقی کے لیے بے حد اہم ہے۔ چینی رہنما نے صنفی مساوات کی اہمیت کو دہراتے ہوئے خواتین کے حقوق کو یقینی بنانے کی اپیل کی ہے، جو بے حد اہمیت کا حامل ہے۔
ہاڈرا تھامس ڈوٹیر نے کہا کہ ہم اس وقت دو بڑے بحرانوں کا سامنا کر رہے ہیں، موسمیاتی تبدیلی اور عدم مساوات۔ ان دونوں شعبوں میں چین نے نمایاں پیشرفت کی ہے۔ انہوں نے دونوں ممالک کے درمیان تعاون کو مثبت قرار دیا اور کہا کہ آئس لینڈ اور چین ایک کہانی تخلیق کر سکتے ہیں جس میں ایک چھوٹا اور ایک بڑا ملک باہمی فوائد کے تحت ایک دوسرے کی صلاحیتوں سے استفادہ کرتے ہوئے تعاون کرتے ہیں۔
چین اور آئس لینڈ کے درمیان جیوتھرمل کے شعبے میں تعاون کافی عرصے سے جاری رہا ہے جو نہ صرف تجارتی تعاون کا نتیجہ بلکہ موسمیاتی بحران کا مقابلہ کرنے کے لیے دونوں ممالک کے تعاون کا بھی مظہر ہے۔ صدر ہاڈرا تھامس ڈوٹیر نے کہا کہ دنیا کو کثیرالجہتی پالیسی کی ضرورت ہے، ہمیں سمجھنا چاہیے کہ ہمارا دنیا میں ایک دوسرے پر انحصار ہے۔ہمیں موجودہ چیلنجز سے نمٹنے کے لیے تعاون کرنا چاہیے، تجارت، سیاحت اور ثقافتی تبادلے کو فروغ دینا چاہیے۔ انٹرویو کے دوران، صدر ہاڈرا تھامس ڈوٹیر نے کہا کہ چین اور آئس لینڈ کے تعلقات میں حاصل ہونے والی شاندار کامیابیاں یہ ظاہر کرتی ہیں کہ مختلف حالات کے حامل ممالک سماجی نظام کے فرق کے باوجود باہمی فائدہ مند تعاون کر سکتے ہیں۔ ہم مستقبل میں چین اور آئس لینڈ کے تعلقات کو بڑھانے ، تعاون کو گہرا کرنے اور دونوں ممالک کے عوام کے لیے مزید فلاح و بہبود کے لیے پُرامید ہیں۔
