ابوظہبی : ابوظہبی ٹی 10لیگ میں رائل چیمپس مشکلات کے باوجود اپنے سفر کو مثبت انداز میں جاری رکھے ہوئے ہیںاور تجربہ کار افغان اسٹار محمد شہزاد کے مطابق ایک مضبوط فرنچائز کی بنیاد رکھنے میں وقت، محنت اور مستقل مزاجی اہم کردار ادا کرتی ہے۔
محمد شہزاد نے ویسٹ انڈیز کے لیجنڈری بولر اور ٹیم کے ہیڈ کوچ کورٹنی واش کے کردار کو ٹیم کی حوصلہ افزائی کے لیے انتہائی اہم قرار دیا۔انہوں نے کہا کہ کاغذ پر بھی ہماری ٹیم اچھی ہے اور گراؤنڈ میں بھی۔ ہماری محنت وہی ہے۔ ہمارے کوچ اور کپتان ہر وقت ہمیں موٹیویٹ کرتے ہیں۔شہزاد کے مطابق ٹیم میٹنگز میں کوچ غلطیوں کی نشاندہی اس انداز میں کرتے ہیں کہ کھلاڑیوں کا حوصلہ برقرار رہے۔وہ چھوٹی غلطیوں پر توجہ دیتے ہیں کہ اگر یہ نہ ہوتی تو نتیجہ مختلف ہو سکتا تھا۔ مقصد صرف مورال بلند رکھنا ہوتا ہے، باقی نتیجہ ہمارے ہاتھ میں نہیں۔
شہزاد کا کہنا تھا کہ رائل چیمپس ایک نئی فرنچائز ہے اور اس کو مستحکم ہونے میں وقت لگے گا۔یہ نئی ٹیم ہے، بہتر ہونے میں وقت لگے گا لیکن ہر سال بہتری آئے گی۔ مینجمنٹ اچھی ہے، ٹیم کی ہر ضرورت پوری کی جاتی ہے۔
ٹیم میں شکیب الحسن، جیسن رائے، ایرون جونز اور ایسرو اُدانا جیسے انٹرنیشنل اسٹارز کی موجودگی کو بھی انہوں نے فرنچائز کا مضبوط پہلو قرار دیا۔ تمام کھلاڑی مختلف ملکوں سے ہیں، ہم سب اکٹھے بیٹھتے ہیں، بات کرتے ہیں، ماحول بہت اچھا ہے۔انہوں نے کہا کہ میچز کے درمیان ہمارے پاس 18 سے 20 گھنٹے ہوتے ہیں۔ ہم سوئمنگ، فزیو اور ہلکی ورزش سے ریکور کرتے ہیں اور اگلے میچ کے لیے تیار ہو جاتے ہیں۔
