ڈاکٹر طار ق سلیم اور سیدعارف شیرازی کا ضلع راولپنڈی کے عہدے داران کے جائزہ اجلاس سے خطاب

اسلام آباد    ( سب نیوز      )    امیر جماعت اسلامی پنجاب ڈاکٹر طارق سلیم نے کہا ہے کہ مینار پاکستان پر ”بدل دو نظام“  کے سلوگن کے ساتھ منعقد ہو نے والا تاریخ ساز اجتماع عام قومی وحدت اور اتحاد امت کا مظہر ہوگا،21تا 23نومبر کو ہونے والا اجتماع عام عوامی شرکت کے حوالے سے سابقہ تمام ریکارڈ توڑ دے گا، اجتماع عام نظام کی تبدیلی کے لیے ٹرننگ پوائنٹ ثابت ہوگا، انھوں نے کہا شمالی پنجاب سے ہزاروں افراد اجتماع عام میں شر یک ہو کر امیر جماعتِ اسلامی حافظ نعیم الرحمن کی پر امن عوامی حقوق اور نظام کو بدلنے کی جدوجہد میں شمولیت کا اعلان کر یں گے،محفوظ اور ترقی یافتہ پاکستان کی جدو جہد میں شامل ہو نے کے لیے ہر فرد کو کو حا فظ نعیم الرحمن کی بدل دو نظام کی تحریک میں شامل ہو نا پڑے گا۔ان خیالات کا اظہار انھوں نے جماعت اسلامی ضلع راولپنڈی کے عہدے داران کے جائزہ اجلاس سے خطاب کر تے ہوئے کیا، اس موقع پر امیر جماعت اسلامی ضلع راولپنڈی سید عارف شیرازی، سیکرٹری جنرل عثمان آکاش، رضوان خان، راجہ جواد اور دیگر نے بھی خطاب کیا۔

ڈاکٹر طارق سلیم نے کہا 27ویں ترمیم غیر آئینی اور غیر شرعی ہے جسے ہم کلیتاًمسترد کرتے ہیں، فیلڈ مارشل اور صدر کا استشنیٰ کسی طرح بھی درست نہیں، اللہ کے رسول ؐ، خلفائے راشدین اور صحابہ کرامؓ خود کو احتساب کے لیے عوام اورعدالت کے سامنے یپش کرتے تھے۔ آئین کا حلیہ بگاڑ نے والی پارٹیاں، خاندان وراثت اور وصیت کی بنیاد پر چلنے والی پارٹیاں ہیں، ہمارا دین اور آئین صدر مملکت سمیت ریاست کے ہر فرد کو قانون کی پابندی کا حکم دیتا ہے۔

سید عارف شیرازی نے کہا جماعت اسلامی کے کارکنان بڑے پیمانے پر شہریوں کو اجتماع عام میں شرکت کی دعوت دیں اور فرسودہ، کرپٹ نظام کے خاتمے کیلئے جماعت اسلامی کی جدو جہد میں شامل ہو نے پر آمادہ کر ے، مینار پاکستا ن پر ہونے والا اجتماع عام ایک فیصلہ کن جدو جہد کا نقطہ آغاز ہو گا، بدل دو نظام کے عزم کے ساتھ ہو نے والا یہ اجتماع عام عوام کو اُن کے بنیادی حقوق کی فراہمی، اسلامی نظام کے نفاذاور باوقار زندگی کی اُمید دلائے گا۔