بخارسٹ(آئی پی ایس )رومانیہ کے ایئر چیف لیفٹیننٹ جنرل لیونارڈ گیبریل بارابوئی نے پاک فضائیہ کے سربراہ ائیر چیف مارشل ظہیر احمد بابر سدھ سے ملاقات کے دوران پاک فضائیہ کو بھارتی جارحیت کے خلاف شاندار کامیابی پر خراجِ تحسین پیش کیا ہے۔
پاک فضائیہ کے سربراہ ائیر چیف مارشل ظہیر احمد بابر سدھو نے رومانیہ کے تاریخی سرکاری دورے کے دوران رومانیہ کی فضائیہ کے سربراہ لیفٹیننٹ جنرل لیونارڈ گیبریل بارابوئی سے ملاقات کی۔اس دورے میں دوطرفہ دفاعی تعلقات کو مضبوط بنانے اور دونوں فضائی افواج کے درمیان تعاون کو بڑھانے کے مواقع تلاش کرنے پر تبادلہ خیال کیا گیا۔فضائیہ ہیڈ کوارٹر آمد پر رومانیہ کی فضائیہ کے چاق و چوبند دستے نے ایئر چیف مارشل ظہیر احمد بابر سدھو کو گارڈ آف آنر پیش کیا۔بعد ازاں ائیر چیف نے لیفٹیننٹ جنرل لیونارڈ گیبریل بارابوئی کے ساتھ مشترکہ فضائی مشقوں، تبادلہ پروگراموں اور فضائی و زمینی عملے کی تربیت سمیت آپریشنل تعاون کو مزید استوار کرنے پر تفصیلی بات چیت کی۔
لیفٹیننٹ جنرل لیونارڈ گیبریل بارابوئی نے بھارتی جارحیت کے خلاف حالیہ کامیابی میں پاک فضائیہ کی پیشہ وارانہ مہارت کی تعریف کی۔ انہوں نے سربراہ پاک فضائیہ کی بصیرت انگیز قیادت میں خود انحصاری کے اقدامات کے ذریعے حاصل کی گئی ترقی کو بھی سراہا۔دونوں معززین نے مشترکہ فضائی دفاعی چیلنجوں سے نمٹنے کے لیے پائیدار تعاون کے لیے مضبوط ادارہ جاتی میکانزم بنانے پر اتفاق کیا۔ ملاقات کے دوران، دونوں ائیر چیفس نے باہمی تعاون کو وسعت دینے پر بھی تبادلہ خیال کیا اور جدید ایرو اسپیس ٹیکنالوجیز میں موجودہ دفاعی صنعتی شراکت داری کو توسیع دینے کے امکانات کا جائزہ لیا۔سربراہ پاک فضائیہ کا رومانیہ کا یہ دورہ پاکستان اور رومانیہ کے عسکری تعلقات میں ایک اہم سنگ میل کی حیثیت کا حامل ہے جو تیزی سے ابھرتے ہوئے سکیورٹی ماحول میں امن، ترقی اور باہمی دفاعی تعاون کے لیے دونوں ممالک کے پائیدار عزم کو اجاگر کرتا ہے۔
