اسلام آباد (سب نیوز)چیئرمین کیپیٹل ڈویلپمنٹ اتھارٹی (سی ڈی اے)و چیف کمشنر اسلام آباد محمد علی رندھاوا نے منگل کے روز ممبر انوائرمنٹ اسفندیار بلوچ، ممبر انجینئرنگ سید نفاست رضا، ڈی جی انوائرمنٹ اور متعلقہ افسران کے ہمراہ پارک روڈ پر قائم سی ڈی اے ماڈل نرسری کا دورہ کیا اور سی ڈی اے ماڈل نرسری کے مختلف سیکشنز کا معائنہ کیا۔
اس موقع پر چیئرمین سی ڈی اے محمد علی رندھاوا کو سی ڈی اے ماڈل نرسری کی اپ گریڈیشن، بحالی اور اسے گارڈینیا حب میں تبدیل کرنے کے حوالے سے تعمیراتی کاموں پر تفصیلی بریفننگ دی گئی۔ بریفنگ دیتے ہوئے انہیں بتایا گیا کہ سی ڈی اے ماڈل نرسری کو گارڈینیا حب میں تبدیل کرنے کا کام مکمل کیا جاچکا ہے۔ انہیں بتایا گیا کہ سی ڈی اے ماڈل نرسری گارڈینیا حب 50ایکڑ سے زائد رقبے پر محیط ہے۔چیئرمین سی ڈی اے کو بریفنگ دیتے ہوئے بتایا گیا کہ اسلام آبادگارڈینیا حب کا شمار ایشیا کی سب سے بڑی نرسریوں میں ہوگا۔ انہیں بتایا گیا کہ گارڈینیا حب میں دس لاکھ سے زائد پودے تیار کئے گئے ہیں۔ چیئرمین سی ڈی اے محمد علی رندھاوا کو بتایا گیا کہ اسلام آباد ماڈل نرسری میں منفرد اور جدید طرز کے تقریبا 25 کنٹرولڈ وینٹیلیٹڈ گرین ہاوس بنائے گئے ہیں۔ انہیں بتایا گیا کہ یہ کنٹرولڈ وینٹیلیٹڈ گرین ہاوسز پودوں کی نشوونما کیلئے بہترین ماحول کی فراہمی اور تحقیق کیلئے معاون ثابت ہونگے۔بریفنگ دیتے ہوئے چیئرمین سی ڈی اے کو بتایا گیا کہ اسلام آباد کی خوبصورتی و شجرکاری اور جنگلات کے تحفظ کیلئے مستقبل کی ضروریات کیلئے ماڈل نرسری میں کثیر تعداد میں پلانٹیشن اسٹاک بھی ہوگا۔
چیئرمین سی ڈی اے کو بریفنگ میں بتایا گیا کہ سی ڈی اے ماڈل نرسری میں فلاور شاپس بھی بنائی گئی ہیں۔ اس سلسلے میں شہریوں کی سہولت کیلئے خصوصی ایپ بھی لانچ کی جائے گی جسکے زریعے پودے خریدے جاسکے گے۔ انہیں بتایا گیا کہ سی ڈی اے ماڈل نرسری میں ٹریننگ و ریسرچ سینٹر کی سہولیات بھی فراہم کی جارہی ہیں۔ اسی طرح ماڈل نرسری میں پودوں کی نئی اقسام کو پروپیگیشن کے جدید طریقوں سے تیار کیا جاسکے گا۔ چیئرمین سی ڈی اے کو مزید بتایا گیا کہ نرسری میں رنگ برنگے پھولوں کی نمائش کیلئے خصوصی جگہ بھی مختص کی گئی ہے۔چیئرمین سی ڈی اے محمد علی رندھاوا نے کہا کہ ماڈل نرسری کو بین الاقوامی معیار کے مطابق اسٹیٹ آف دی آرٹ نرسری کے طور پر بنایا گیا ہے۔ انہوں نے کہا کہ سی ڈی اے انوائرمنٹ ونگ کے ملازمین کو پودوں کی دیکھ بھال اور حفاظت کیلئے خصوصی ٹریننگ کا بھی اہتمام کیا جائے۔چیئرمین سی ڈی اے نے کہا کہ سی ڈی اے نرسری کی اپ گریڈیشن کا بنیادی مقصد اسلام آباد کو ہارٹیکلچر کے شعبے میں ایک اہم مرکز کے طور پر متعارف کروانا ہے۔ انہوں نے مزید کہا کہ اسلام آباد نرسری کی گارڈینیا حب کے طور پر اپگریڈیشن اسلام آباد کو مزید خوبصورت اور سرسبز و شاداب دارالحکومت بنانے کی جانب ایک اہم قدم ہے۔
