اسلام آباد(سب نیوز)صدر مملکت آصف علی زرداری نے چینی وزیرخارجہ وانگ ای سے ملاقات میں دونوں ممالک کے تعلقات پر تبادلہ خیال کرتے ہوئے چین کے ساتھ فولادی بھائی چارے کے عزم کی تجدید کی۔
ایوان صدر سے جاری اعلامیے کے مطابق صدر مملکت آصف علی زرداری سے ایوان صدر میں چینی وزیر خارجہ وانگ ای نے ملاقات کی۔ صدر آصف زرداری نے چین کے ساتھ فولادی بھائی چارے کے عزم کی تجدید کی اور کہا کہ پاکستان اور چین آزمودہ دوست اور ہر موسم کے شراکت دار ہیں۔انہوں نے کہا کہ چین کے ساتھ دوستی پاکستان کی خارجہ پالیسی کا بنیادی ستون ہے، چین نے ہمیشہ پاکستان کی خودمختاری اور سالمیت کی حمایت کی ہے۔
صدر مملکت نے بیجنگ اور گانسو کے سیلاب پر چین سے اظہار تعزیت کیا، ان کا کہنا تھا کہ پاک-چین اقتصادی راہدرای (سی پیک) پاک-چین مشترکہ وژن کی تکمیل کا اہم ذریعہ ہے۔انہوں نے کہا کہ 2026 میں پاک-چین سفارتی تعلقات کی 75 ویں سالگرہ شایان شان انداز میں منائی جائے گی۔چینی وزیر خارجہ نے کہا کہ چین اور پاکستان کی دوستی نسل در نسل قائم ہے۔صدر مملکت اور چینی وزیرخارجہ کی ملاقات میں دوطرفہ تعاون اور علاقائی سلامتی پر بھی تبادلہ خیال کیا گیا۔
صدر زرداری سے چینی وزیر خارجہ کی ملاقات ، فولادی بھائی چارے کے عزم کی تجدید
روزانہ مستند اور خصوصی خبریں حاصل کرنے کے لیے ڈیلی سب نیوز "آفیشل واٹس ایپ چینل" کو فالو کریں۔