سوشل میڈیا پر مذہبی منافرت پھیلانے والے عناصر کیخلاف سخت کارروائی کا فیصلہ

اسلام آباد (سب نیوز)سوشل میڈیا پر مذہبی منافرت پھیلانے والے عناصر کیخلاف سخت کارروائی کا فیصلہ کرلیا گیا۔
وزیر داخلہ محسن نقوی کی زیرصدارت محرم الحرام سیکیورٹی پلان پر اجلاس میں سوشل میڈیا پر مذہبی منافرت پھیلانے والے عناصر کیخلاف سخت کارروائی کا فیصلہ کر لیا گیا۔ الیکٹرانک اور سوشل میڈیا پر نفرت انگیز مواد کی روک تھام کے لئے پیمرا کو واضح سفارشات ارسال کی جائیں گی۔اجلاس میں طے پایا کہ محرم الحرام کے دوران امن وامان یقینی بنانے کیلئے تمام ضروری انتطامی اقدامات اٹھائیجائیں گے۔ انٹرنیٹ یا موبائل فون سروس کی بندش کا فیصلہ متعلقہ صوبوں کی مشاورت سے کیا جائے گا۔
وفاقی وزیر داخلہ نے ہدایت کی کہ انٹرنیٹ یا موبائل فون سروس کی بندش کا فیصلہ زمینی حقائق اور سیکیورٹی صورتحال کو مدنظر رکھ کر کیا جائے ۔ تمام ضروری اقدامات اور فیصلے باہمی مشاورت سے کئے جائیں گے۔چاروں صوبوں، آزاد کشمیر، گلگت بلتستان اور اسلام آباد میں قیام امن کے لئے وفاق ہر ممکن تعاون فراہم کرے گا۔ کسی کو بھی اشتعال انگیزی اور شرپسندی کی اجازت ہرگز نہیں دی جائے گی۔ ضابطہ اخلاق کی سختی سے پابندی کرائی جائے گی۔ جلوسوں اور مجالس کی جدید ٹیکنالوجی کے ذریعے نگرانی یقینی بنائی جائے گی۔
اجلاس میں چاروں صوبوں، آزادکشمیر، گلگت بلتستان اور اسلام آباد کےآئی جیز پولیس اور سیکرٹریز داخلہ نے محرم سکیورٹی پلان پر بریفنگ دی ۔ وزیرمملکت طلال چوہدری ، وزارت داخلہ اور قانون نافذ کرنے والے اداروں کے اعلی حکام اجلاس میں شرکت تھے۔