امریکی حملے کے بعد ایرانی فردو جوہری سائٹ کی کیا صورتحال ہے؟ سربراہ آئی اے ای اے کا بیان سامنے آگیا

عالمی ایٹمی توانائی ایجنسی (آئی اے ای اے) کے سربراہ رافیل گروسی نے ایران کی صورتحال پر اقوام متحدہ کی سلامتی کونسل کے سامنے ایک بیان دیا، جس میں ایران کی جوہری تنصیبات کو پہنچنے والے نقصانات کی اطلاع دی گئی۔
گروسی نے ادارے کی جانب سے جاری کردہ بیان میں کہا کہ یہ واضح ہے کہ فردوا تنصیب براہ راست متاثر ہوئی ہے، لیکن یہ تعین کرنا ممکن نہیں کہ یورینیم افزودگی کی سائٹ کس قدر متاثر ہوئی ہے۔
بیان میں کہا گیا ہے کہ امریکہ کی جانب سے ، ایران کی فردوا، نطنز اور اصفہان میں تین جوہری تنصیبات پر حملہ کیا گیا۔ اسرائیل کی جانب سے متعدد بار حملوں کا نشانہ بننے والی اصفہان کی جوہری تنصیب کو مزید نقصان پہنچا ہے۔
گروسی نے کہا کہ ایران کے جوہری نگران ادارے نے بین الاقوامی جوہری توانائی ایجنسی کو مطلع کیا ہے کہ تین جوہری تنصیبات پر حملوں کے بعد، تابکاری کی سطح میں اضافہ نہیں ہوا ہے۔
گروسی نے بیان میں کہا کہ متعلقہ ممالک کو فوری طور پر سفارتی اقدامات اپنانے کی ضرورت ہے تاکہ دشمنانہ کارروائیوں کا خاتمہ کیا جا سکے، اور بین الاقوامی جوہری توانائی ایجنسی کو ایران میں جانچ کی سرگرمیاں بحال کرنے کی اجازت دی جا سکے۔