لاہور (سب نیوز)سابق وفاقی وزیر خواجہ سعد رفیق نے امریکا کے ایران پر حملے کے بعد کہا ہے کہ ایران افغانستان کی طرح امریکی غرور خاک میں ملا دے گا۔تفصیلات کے مطابق سابق وفاقی وزیر خواجہ سعد رفیق نے اپنے بیان میں کہا ہے کہ ایران پر اسرائیلی حملہ، امریکی صہیونی سازش کا پہلا مرحلہ تھا اور جنگ کے دوسرے مرحلے میں امریکا کھل کر سامنے آ گیا۔
امریکا صیہونی کنٹرولڈ ریاست بن چکا ہے اور امریکی حکمران اپنے نہیں بلکہ صہیونی مفادات کی غلامی کرتے ہیں۔ ٹرمپ کو اقتدار تک پہنچانے والوں شرمسار ہونا چاہیے۔انہوں نے ایران پر امریکی حملے کو بدترین جارحیت اور عالمی قوانین کی خلاف ورزی قرار دیتے ہوئے کہا کہ امریکا نے ایران کے پر امن ایٹمی پروگرام کو جھوٹے جواز کے طور پر استعمال کیا۔ ایران کا ردعمل تدبر، جرات اور حکمت کا امتزاج ہوگا۔ ایران بھی افغانستان کی طرح امریکی غرور کو مٹی میں ملا دے گا اور امریکی استعمار ماضی کی طرح اس جنگ میں بھی شکست کھائے گا۔سعد رفیق نے یہ بھی کہا کہ اگر جنگ بندی نہ ہوئی تو یہ جنگ پورے خطے کو لپیٹ میں لے سکتی ہے۔ چین، روس اور مسلم ممالک کو مشترکہ لائحہ عمل اپنانا ہوگا، بصورت دیگر چین اور روس عالمی فیصلہ سازی سے باہر ہو جائیں گے۔
