مریم نواز کی جانب سے اپنا نام غلط لینے پر معروف برازیلین رائٹر پالو کویلہو کا ردعمل آگیا

پاکستانی سیاست میں زبان کا پھسلنا اور حقائق کا غلط حوالہ دینا کوئی معمولی بات نہیں ہے،کانپیں ٹانگ رہی ہیں سے لے کر جرمنی اور جاپان کی مشترکہ سرحدیں تک، پاکستانیوں نے سیاستدانوں کی کئی غلطیاں دیکھی ہیں۔
اب مسلم لیگ ن کی چیف آرگنائزر مریم نواز کی تازہ ترین غلطی نے نہ صرف مقامی توجہ حاصل کی ہے بلکہ بین الاقوامی سطح پر بھی توجہ حاصل کی جس میں عالمی شہرت یافتہ مصنف پالو کویلہو بھی شامل تھے۔
ماجرا کیا ہے؟
ہوا دراصل یہ کہ مریم نواز نے ایک انٹرویو میں برازیل کے نامور مصنف پالو کویلہو کا غلط نام لیا جنہوں نے دی الکیمسٹ سمیت کئی بین الاقوامی کتابیں تحریر کی ہیں۔
انٹرویو کے دوران مریم نواز نے پالو کویلہو کی جگہ پالو ‘کویڈو’ کہہ ڈالا جس کی ویڈیو ٹوئٹر پر وائرل ہوگئی۔
دوران انٹرویو مریم نواز سے ان کی پسندیدہ کتابوں کے حوالے سے پوچھا گیا تو انہوں نے جواب میں کہا کہ انہیں تاریخ میں خاصی دلچسپی ہے، جیسا کہ مصنف پالو کویڈو ہیں، میں انہیں بہت شوق سے پڑھتی ہوں۔
مریم نواز کا ویڈیو کلپ سوشل میڈیا پر وائرل ہوا تو صارفین کی جانب سے ان پر خاصی تنقید کی گئی اور مختلف تبصرے بھی کیے گئے جب کہ اس کے برعکس پالو کویلہو نے بذات خود اس ویڈیو پر ردعمل دیا۔
برازیلین مصنف کی جانب سے مریم کی غلطی کا دفاع کیا گیا۔
انہوں نے تمام ناقدین کے لیے ویڈیو کو شیئر کیا اور لکھا ‘میں غیر ملکی ناموں کے تلفظ میں اکثر غلطیاں کرتا ہوں لہذا تنقید نہ کریں’۔