فتح جنگ : وزیراعلیٰ پنجاب مریم نواز شریف کے عوامی ریلیف ویژن اور فلاحی ایجنڈے پر عملدرآمد کے سلسلے میں تحصیل فتح جنگ میں گراں فروشی اور عوامی شکایات کے خلاف کارروائیوں میں تیزی آ گئی ہے۔
ضلعی انتظامیہ کی ہدایت پر پرائس کنٹرول مجسٹریٹ اور تحصیلدار فتح جنگ چوہدری شفقت محمود نے متعدد علاقوں کا دورہ کیا، جن میں کوہاٹ روڈ، اٹک روڈ اور فتح جنگ چوک شامل ہیں۔کارروائی کے دوران بارہا وارننگ دیے جانے کے باوجود زائد نرخوں پر اشیاء فروخت کرنے والے سبزی فروش کے خلاف کارروائی کی گئی، گلے سڑے پھل و سبزیاں تلف کر دی گئیں، بھاری جرمانہ عائد کیا گیا اور موقع پر ایف آئی آر درج کی گئی۔
اسی طرح مین کوہاٹ روڈ پر ویگن سٹینڈ کے اطراف غیر قانونی تجاوزات اور سڑک بلاک کرنے پر متعدد بار انتباہ کے بعد سخت کارروائی کی گئی۔ ویگن مالکان کو جرمانہ کیا گیا اور خلاف ورزی پر مقدمہ درج کر دیا گیا۔ڈپٹی کمشنر اٹک عاطف رضا اور اسسٹنٹ کمشنر فتح جنگ حمیرہ شاہ کی واضح ہدایات پر یہ کارروائیاں عمل میں لائی جا رہی ہیں تاکہ عوام کو گراں فروشی، ملاوٹ اور ٹریفک مسائل سے نجات دلوائی جا سکے۔ ضلعی انتظامیہ نے شہریوں سے اپیل کی ہے کہ وہ ایسے عناصر کی نشاندہی جاری رکھیں تاکہ ان کے خلاف فوری ایکشن لیا جا سکے۔
