اسلام آباد (سب نیوز)شہر اقتدار کا ایک اور منصوبہ 35روز کی ریکارڈ مدت میں مکمل ،وزیر اعظم محمد شہباز شریف کل پراجیکٹ کا افتتاح کریں گے ۔جناح سکوائر مری روڈ انڈر پاس پراجیکٹ کا فنشنگ ورک تیزی سے جاری ،وفاقی وزیر داخلہ محسن نقوی نے جناح سکوائر مری روڈ انڈرپاس پراجیکٹ کا دورہ کیا اور منصوبے کے فنشنگ ورک کا جائزہ لیا۔
وفاقی وزیرداخلہ محسن نقوی نے فنشنگ ورک مکمل کرنے کی ہدایت کرتے ہوئے کہا کہ کام کے اعلی معیار پر کوئی سمجھوتہ نہیں ہو گا، پراجیکٹ کے دونوں اطراف لینڈ سکیپنگ اور خوبصورت پودے لگائے جائیں ۔ انہوں نے کہا کہ موٹر وے اور مری کی طرف سفر کرنے والوں کو بہت ریلیف ملے گا، منصوبے سے اسلام آباد کے شہری سگنل فری اور باسہولت سفر کر سکیں گے،شہریوں کو سگنل فری اور باسہولت سفر ہماری اولین ترجیح ہے۔
چیئرمین سی ڈی اے محمد علی رندھاوا نے وفاقی وزیر داخلہ کو منصوبے پر پیش رفت کے حوالے سے بریفنگ دی اور بتایا کہ اسفالٹ کا کام مکمل ہو چکا ہے،فنشنگ ورک رات تک مکمل کر لیں گے، وفاقی سیکرٹری داخلہ، ڈی سی اسلام آباد اور ممبران سی ڈی اے بھی اس موقع پر موجود تھے۔
