پشاور(آئی پی ایس )خیبرپختونخوا اسمبلی کی فل ہاوس کمیٹی کے پہلے اجلاس میں پختون قومی جرگے کے مطالبات پر پیش رفت اور سفارت شات کے لیے ذیلی کمیٹی تشکیل دینے کا فیصلہ کیا گیا، جس میں حکومت اور اپوزیشن دونوں طرف کے اراکین شامل ہوں گے۔
وزیراعلی ہاوس خیبرپختونخوا سے جاری اعلامیے کے مطابق وزیراعلی خیبر پختونخوا علی امین خان گنڈاپور کی زیر صدارت صوبائی اسمبلی کی فل ہاوس کمیٹی کا پہلا اجلاس منعقد ہوا۔اجلاس میں اسپیکر اور ڈپٹی اسپیکر صوبائی اسمبلی کے علاوہ اپوزیشن لیڈر اور دیگر اراکین اسمبلی نے شرکت کی اور پختون قومی جرگے کے مطالبات پر پیش رفت کے لیے لائحہ عمل پر غور کیا گیا۔ وزیراعلی کے پی کی زیرصدارت اجلاس میں پختون قومی جرگے کی طرف سے پیش کردہ مطالبات اور مسائل کے حل پر پیش رفت کے لیے ذیلی کمیٹی تشکیل دینے کا فیصلہ کیا گیا۔
اعلامیے کے مطابق ذیلی کمیٹی میں اسمبلی میں موجود تمام سیاسی جماعتوں کی نمائندگی ہوگی، کمیٹی ایک ہفتے میں پختون قومی جرگے کی طرف سے پیش کردہ 27 نکات اور مطالبات پر پیش رفت کے لیے اتفاق رائے سے تجاویز پیش کرے گی۔ اس حوالے سے بتایا گیا کہ مذکورہ تجاویز اسمبلی کی فل ہاس کمیٹی کے سامنے پیش کی جائیں گی، فل ہاس کمیٹی وفاقی حکومت سے جڑے مسائل ضروری کارروائی کے لئے وفاق کو بھیجے گی۔اسی طرح صوبائی حکومت سے متعلق مسائل ضروری کارروائی کے لیے صوبائی حکومت اور دیگر اداروں سے جڑے مسائل متعلقہ اداروں کو بھیجے جائیں گے۔
