اسلام آباد میں حملوں کا بڑا منصوبہ ناکام ، 2 دہشت گرد گرفتار

اسلام آباد کیپیٹل پولیس کانٹر ٹیررازم ڈیپارٹمنٹ نے وفاقی دارلحکومت اسلام آبا د میں دہشت گردی کا بڑا منصوبہ ناکام بنا دیا۔اسلام آبا د کیپیٹل پولیس نے ایک بڑے آپریشن کے دوران سنگجانی کے علاقے سے دو مطلوب دہشت گردوں کو گرفتا رکر لیا،گرفتار دہشت گردوں میںحمزہ عرف غازی رحمان ولدغازی مرجان سکنہ جان خانخیل تحصیل دتہ خیل میرانشاہ شمالی وزیر ستان اورشیر عالم عرف عمرولد گل حیدرسکنہ جنگلی نہر ڈاکخانہ بڈھ بیر میراہ تحصیل و ضلع پشاور شامل ہیں،یہ دہشت گر داسلام آباد کیپیٹل پولیس ،سیاسی رہنماوں،لااینڈ انفورسمنٹ ایجنسیز اورمستقبل میں سیا سی اجتماعات اور سرگرمیوں پر حملوں کی منصوبہ بندی کر رہے تھے،یہ دہشت گرد ہمزونی میں پاک آرمی پر دہشت گردانہ حملے اور ہمزونی میں آرمی چیک پوسٹ پر فائرنگ اور اس جیسی متعدد کارروئیوں میںشامل تھے،دہشت گردوغازی الرحمان نے افغانستان سے دو مہینے قبل دہشت گردی کی ٹریننگ حاصل کی تھی، یہ دہشت گرد ضرب عضب کے دوران اپنی فیملی کے ساتھ بنوں منتقل ہوا اور دو سال تک مقیم رہا،2016میں دوبارہ اپنے آبائی علاقے منتقل ہوا، 2021میں یہ دہشت گرد وفاقی دارلحکومت اسلام آباد آیا اور سکیورٹی کمپنیزمیں بطور سکیورٹی کارڈ کے روپ میں ٹھہرا رہا ۔دہشت گرد شیر عالم پشاور کا رہائشی ہے ،جس نے تین سے چار سال تک بھٹے پر مزدوری کی اور اسی دوران اس نے گاڑیوں کی وائرنگ کے متعلق تجربہ حاصل کیا ،اس نے اپنے ایک دوست عبدالرزق کے کہنے پر دہشت گردگروپ ملا نبی جوائن کیا،2016-17 میں اس نے ملانبی مرکز ٹہل سے ایک ہفتے کی ملٹری ٹریننگ حاصل کی اور پھر افغانستان منتقل ہو گیا جہا ں سے اس نے تحریک طالبان افغانستان تورابورا سے چالیس دن کی مزید ٹریننگ حاصل کی ،اس نے اپنے دوست عبدالرزق کی طرف سے ٹیلیفونک دعوت پر تحریک طالبان پاکستا ن جوائن کیا،پولیس نے کارروائی کے دوران دونوں دہشت گردوں کے قبضے سے بڑی تعداد میں بارودی مواد اور اسلحہ بر آمد کر لیا،دہشت گردوں کیخلاف تھانہ سی ٹی ڈی میں مقدمہ نمبر13بجرم 7ATA,4/5EA درج کر دیا گیاہے۔