اسلام آباد(وقائع نگارخصوصی )عید الاضحی کی آمد سے قبل اسلام آباد فوڈ اتھارٹی ان ایکشن ،اسلام آباد فوڈ اتھارٹی کے سینئر ویٹرنری سپیشلسٹ کا مویشی منڈیوں کا دورہ،ویٹرنری سپیشلسٹ کی بیوپاریوں کو ویٹرنری قوانین کے متعلق تفصیلی آگاہی دی گئی جس کے مطابق مویشی منڈی میں صرف صحت مند تندرست جانور فروخت کرنے کی اجازت ہوگی بیوپاری روزانہ کی بنیاد پر کوڑے دان خالی کریں گے ،اور بچا ہوا چارا منڈی میں نہیں رکھا جائیگا ۔
ڈپٹی ڈائریکٹر اسلام آباد فوڈ اتھارٹی ڈاکٹر طاہرہ صدیق نے کہا کہ کوڑے دان مختلف مقامات پر رکھے جائیں ،جانوروں کی فیڈ کو ڈھانپ کر رکھا جائے، بیمار یا کمزور جانوروں کو ایک مخصوص قرنطینہ میں الگ کرنا ہوگا، مویشی پال جانوروں کے لیے سایہ دار جگہیں اور پینے کا صاف پانی مہیا کریں۔ پینے والے صاف پانی کو صاف برتن میں ڈھانپ کر حشرات کی پہنچ سے دور رکھیں، شہری اور مالک جانوروں کو ہاتھ لگانے کے بعد صابن یا سینیٹائزر سے ہاتھ دھوئیںجانوروں کی صفائی کے دوران دستانے اور ماسک کا استعمال کریں،مویشی منڈی کی حدود میں کھانے پینے کی اشیا لانے، استعمال کرنے اور سگریٹ نوشی سے پرہیز کریں۔
منڈی میں موجود جانوروں کی باقیات کو تلف کرنے کے لیے مناسب اقدامات کریں بدبو اور بیماری کے پھیلا کے تدارک کے لیے چونے یا جراثیم کش ادویات کا استعمال کریں۔ شہری بھی منڈی میں آتے وقت حفظان صحت کے اصولوں پر عمل یقینی بنائیں نکاسی آب کو مکمل فعال رکھیں، تمام جانوروں کو حفاظتی ٹیکے لگائے جائیں۔
