بھارتی فوج بنگلہ دیشی سرحد پر بھی الرٹ، میڈیا میں جنگ ٹھنڈی پڑ گئی

نئی دہلی (سب نیوز)بھارت کے ذرائع ابلاغ میں جنگ کا جنون بدھ کی شام سے ٹھنڈا پڑنا شروع ہوگیا ہے۔ دوسری جانب بھارت نے بنگلہ دیش کی سرحد پر بھی فوج الرٹ کردی ہے۔ اس سے پہلے بنگلہ دیش کے عبوری سربراہ ڈاکٹر یونس نے فوجی تیاریوں کے حوالے سے ایک بیان دیا تھا۔
بھارت میں پہلگام حملے کے بعد یہ بھارتی ذرائع ابلاغ ہی تھے جنہوں نے پاکستان پر الزامات عائد کیے اور ریزسٹنس فرنٹ کے نام سے ذمہ داری قبول کرنے کا جھوٹا بیان بھی شائع کیا۔ انہی بھارتی ذرائع ابلاغ نے یہ دعوی بھی کیا کہ حملہ آوروں نے بھارتی سیاحوں کو ان کا مذہب پوچھ کر ہلاک کیا۔مودی حکومت سے کشمیر میں سیاحوں کی سیکورٹی میں ناکامی پر سوالات پوچھنے کے بجائے جنگ کا ماحول پیدا کرنے والا بھارتی میڈیا بدھ کے سہ پہر سے حیرت انگیز طور پر اپنا رخ موڑ چکا ہے۔ بدھ کی شام بھارتی ذرائع ابلاغ میں سب سے بڑی خبر یہ تھی کہ بھارت میں ذات کی بنیاد پر مردم شماری ہوگی۔ جنگ کی خبریں پیچھے چلی گئی تھیں۔
یہ رحجان جمعرات کی صبح بھی برقرار رہا اور بھارتی ذرائع ابلاغ میں مردم شماری نمایاں خبر رہی۔ دوسری نمایاں ترین خبر بھارت کی نیشنل انوسٹی گیشن ایجنسی کے سربراہ کی مقبوضہ کشمیر آمد کی تھی جو وہاں تحقیقات کے لیے پہنچے۔ بھارتی میڈیا نے پہلگام حملے کا الزام پاکستان پر عائد کردیا تھا تاہم تحقیقات اب شروع ہو رہی ہیں۔بھارتی میڈیا نے پہلگام حملے کی تحقیقات کے لیے سپریم کورٹ میں دائر درخواست مسترد ہونے کی خبر بھی دی۔ اور ساتھ ہی انڈیا پاکستان ایٹمی تصادم کے نقصانات کی بھی بات کی۔ بھارتی میڈیا اس سے پہلے روایتی جنگ کی باتیں کر رہا تھا تاہم پاکستان کی جانب سے مسلسل جوہری ہتھیاروں کے استعمال کی وارننگ کے بعد اب لہجہ کافی تبدیل ہوچکا ہے۔
بھارت میں بدھ سے حالات یہ ہیں کہ اپوزیشن رہنما راہول گاندھی نے مودی حکومت کو طعنے دینا شروع کردیئے ہیں کہ وہ ٹال مٹول سے کام نہ لے اور پاکستان پر حملہ کرے۔دوسری جانب بھارت نے میانمر اور بنگلہ دیش کی سرحدوں پر بھی فوج کو الرٹ کردیا ہے۔ اگرچہ اس الرٹ کی وجہ نہیں بتائی گئی تاہم سوشل میڈیا پر اس کا تعلق بنگلہ دیش کے عبوری سربراہ ڈاکٹر یونس کے بیان سے جوڑا جا رہا ہے جنہوں نے بدھ کے روز فوج پر وقت تیار رہنے کی ہدایت کی ہے۔
فوجی اور سول افسران سے خطاب کرتے ہوئے ڈاکٹر یونس کا کہنا تھا کہ موجودہ حالات میں ہمیں اپنی مجموعی سٹریٹجی مرتب کرنی چاہیے۔ ہمیں ہمیشہ امن کی جانب ہاتھ بڑھانا چاہیے لیکن ہمیں ہر وقت تیار بھی رہنا چاہیے۔