نیوزی لینڈ سے گھر میں ہی شکست، بھارتی تھنک ٹینک سے سوالوں کی بوچھاڑ، اختلافات سامنے آگئے

نئی دہلی (سب نیوز )نیوزی لینڈ کے ہاتھوں ہوم ٹیسٹ سیریز میں کلین سوئپ پر بھارتی کرکٹ ٹیم کے تھنک ٹینک سے بازپرس شروع ہوگئی۔بھارتی میڈیا کے مطابق بی سی سی آئی نے آسٹریلیا روانگی سے قبل کپتان کوچ اور چیف سلیکٹرکو طلب کیا، اس میٹنگ میں بھارتی بورڈ سے راجر بنی، جے شاہ اور دیگر اہم عہدیدار شامل تھے جب کہ 6 گھنٹے کی میٹنگ میں بھارتی ٹیم کے تھنک ٹینک پرسوالات کی بوچھاڑ کردی گئی۔

بھارتی ٹیم کے تھنک ٹینک میں کپتان روہت شرما، کوچ گوتم گمبھیر اور چیف سلیکٹر اجیت اگرکار شامل تھے، میٹنگ میں گوتم گمبھیر کی کوچنگ کے حوالے سے بھی بات ہوئی۔میڈیا رپورٹس کے مطابق گوتم گمبھیر کو راہول ڈریوڈ سے مختلف کوچ قرار دیا گیا جب کہ کپتان، کوچ اور سلیکٹر بھی ایک پیج پر نہیں ہیں، بھارتی ٹیم کے تھنک ٹینک میں اختلافات پائے جاتے ہیں۔ اس کے علاوہ تیسرے ٹیسٹ میچ میں جسپریت بمرا کو آرام دینے پر سوالات بھی اٹھائے گئے۔