حکومت نے فسطائیت کی انتہا کر دی، ایسا مارشل لا میں بھی نہیں ہوتا، اسد قیصر

پشاور (آئی پی ایس )سابق اسپیکر قومی اسمبلی اور رکن قومی اسمبلی اسد قیصر نے کہا ہے کہ حکومت نے فسطائیت کی انتہا کر دی ہے، ایسا مارشل لا میں بھی نہیں ہوتا۔

پشاور میں میڈیا سے گفتگو کرتے ہوئے اسد قیصر نے کہا کہ سیکیورٹی کی آڑ میں حکومت نے راولپنڈی اور اسلام آباد کی آبادی کو یرغمال بنایا ہوا ہے، راستے بند کرنا اور جلسے میں رکاوٹیں ڈالنا عدالتی احکامات کی خلاف ورزی ہے۔انہوں نے کہا کہ جلسے میں شرکت کے لیے سب پاکستانیوں کو نکلنا ہوگا، امید ہے کہ اسلام آباد اور پنڈی ڈویژن کے عوام جلسے کے لیے ضرور نکلیں گے، لوگوں میں ہمت اور جذبہ ہے، حکومتی ہتھکنڈے لوگوں کو روک نہیں سکتے۔سابق اسپیکر قومی اسمبلی نے کہا کہ ہمارا جلسہ پرامن ہوگا، انتشار کی سیاست پر یقین نہیں رکھتے۔انہوں نے مزید کہا کہ یہ ہمارا آئینی حق ہے کہ ہم اپنی آواز عوام تک پہنچائیں۔