کوئٹہ:آرمی چیف جنرل سید عاصم منیر نے کہا ہے کہ عدم استحکام پیدا کرنے کے لیے اندرونی عناصر اور بیرونی قوتوں کے درمیان گٹھ جوڑ عوام کے سامنے بے نقاب ہو چکا ہے۔پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق آرمی چیف جنرل سید عاصم منیر نے کوئٹہ گیریژن کا دورہ کیا، کمانڈر کوئٹہ کور نے استقبال کیا۔ جہاں انہوں نے کمانڈ اینڈ سٹاف کالج کوئٹہ کے افسران سے خطاب کیا۔
انہوں نے کوئٹہ گیریژن میں فوجیوں کے لیے مختلف فلاحی سکیموں کا بھی دورہ کیا۔بیان کے مطابق افسران سے خطاب کرتے ہوئے سپہ سالار نے روایتی، ذیلی روایتی اور ففتھ جنریشن وارفیئر کے لیے آپریشنل تیاریوں پر زور دیا۔ اس موقع پر آرمی چیف کا کہنا تھا کہ جو لوگ پاکستان کے عوام اور مسلح افواج کے درمیان اٹوٹ رشتہ کو کمزور کرنے کی ناکام کوششیں کر رہے ہیں وہ انشا اللہ کبھی کامیاب نہیں ہو سکیں گے۔ان کا کہنا تھا کہ پاکستان کی مسلح افواج ہمیشہ بہادر اور قابل فخر لوگو ںکی مقروض ہیں جنہوں نے ملک کے طول و عرض میں مسلح افواج سے اپنی منفرد محبت کے حالیہ مظہر کے ذریعے دشمن اور ان کے ساتھیوں کے مذموم عزائم کو منہ توڑ جواب دیا ہے۔
جنرل عاصم منیر کا کہنا تھا کہ عدم استحکام پیدا کرنے کے لیے اندرونی عناصر اور بیرونی قوتوں کے درمیان گٹھ جوڑ عوام کے سامنے بے نقاب ہو چکا ہے۔ پاک فوج جو کہ دنیا کی سب سے مضبوط افواج میں سے ایک ہے، اللہ کی رحمتوں اور اہل پاکستان کی بے مثال حمایت سے الحمدللہ اسے نہ تو کوئی روک سکتا ہے اور نہ ہی مجبور کر سکتا ہے۔
