اسلام آباد(سب نیوز)چیئرمین سی ڈی اے و چیف کمشنر اسلام آباد محمد علی رندھاوا نے جمعرات کے روز سی ڈی اے ہیڈکوارٹرز میں ڈویلپمنٹ ورکنگ پارٹی (سی ڈی اے-ڈی ڈبلیو پی)کی 77ویں اجلاس کی صدارت کی۔ اجلاس میں پلاننگ، ڈویلپمنٹ اینڈ اسپیشل انیشیٹیوز ڈویژن، وزارت داخلہ، فنانس ڈویژن کے سینئر افسران، سی ڈی اے بورڈ کے ممبران سمیت متعلقہ فارمیشنز اور پراجیکٹ کنسلٹنٹس کے نمائندوں نے شرکت کی۔سی ڈی اے-ڈی ڈبلیو پی نے 77ویں اجلاس میں شہر کے روڈ انفراسٹرکچر اور سروس ڈیلیوری سے متعلق منصوبوں کی منظوری دی۔
اجلاس میں اسلام آباد کے مختلف مقامات پر پانی کے تحفظ، زیر زمین پانی کی سطح بلند کرنے اور بارش کے پانی کو زیر زمین ری چارج کرنے کیلئے رین واٹر ری چارج ایبل ویلز (بارش کے پانی کے ذخیرہ کیلئے کنویں)تعمیر کرنے کے منصوبے کی منظوری دی گئی۔ اجلاس میں بریفننگ دیتے ہوئے بتایا گیا کہ کنسلٹنٹ نے سی ڈی اے کو 100 مختلف مقامات کی نشاندہی میں معاونت فراہم کی ہے۔ قبل ازیں، سال 2023 میں سی ڈی اے نے 100 ری چارج ایبل ویلز تعمیر کئے تھے جنکے پی سی آر ڈبلیو کی رپورٹ کے مطابق اچھے نتائج سامنے آئے انہی نتائج کی روشنی میں مزید 100 ری چارج ایبل ویلز تعمیر کرنے کا فیصلہ کیا گیا ہے جو گرین بیلٹس، کھلی جگہوں (اوپن اسپیسز)اور دیگر مقامات پر تعمیر کئے جائیں گے جس کیلئے 185.282 ملین روپے کے پی سی-ون کی منظوری دی گئی۔سی ڈی اے-ڈی ڈبلیو پی نے بارش کے پانی کے ضیاع کو روکنے کیلئے اسلام آباد کے مختلف مقامات پر 20 زیر زمین واٹر ٹینکس تعمیر کرنے کیلئے 1404.24 ملین روپے کے بجٹ کی بھی منظوری دی۔ اجلاس کو بتایا گیا کہ اس منصوبے کے تحت اسلام آباد میں قدرتی نالوں سے بہنے والے صاف پانی کو ذخیرہ کرنے کیلئے پہلے مرحلے میں مختلف مقامات پر تقریبا 10 بڑے واٹر ٹینکس تعمیر کئے جائیں گے۔ اجلاس کو بتایا گیا کہ پہلے مرحلے کے نتائج کا جائزہ لینے کے بعد اگلے مرحلے میں مزید 10 بڑے واٹر ٹینکس تعمیر کئے جائیں گے۔ واسا کے نمائندے نے بریفننگ دیتے ہوئے اجلاس کو بتایا کہ لاہور میں بڑے رین واٹر ٹینکس سے بہترین نتائج حاصل ہوئے ہیں اور وہ اس سلسلے میں سی ڈی اے کے ساتھ بھرپور تعاون کریں گے۔اجلاس میں اسلام آباد میں قدرتی نالوں اور چینلز سے پانی کی آلودگی ختم کرنے کیلئے مختلف مقامات پر 11 ویٹ لینڈز تعمیر کرنے کی منظوری دی گئی۔
اجلاس کو بتایا گیا کہ یہ ویٹ لینڈز آلودہ پانی کو آبادیوں میں واپس دینے سے پہلے سائنسی طور پر ٹریٹ کریں گے۔ اجلاس میں اس بات پر بھی روشنی ڈالی گئی کہ تجویز کردہ ویٹ لینڈز پانی کو صاف کریں گے، سیلاب کو کنٹرول کریں گے اور یہ جانوروں کی بقا سمیت انسانی فلاح و بہبود دونوں کیلئے انتہائی اہم ہیں۔اجلاس میں روات، ٹی چوک سے دریائے سواں تک نشیبی علاقوں میں ایک آر سی سی سیور پائپ لائن تعمیر کرنے کی بھی منظوری دی گئی۔ اس منصوبے کیلئے 88.74 ملین روپے کذ پی سی-ون منظور کیا گیا۔ اجلاس کو بتایا گیا کہ یہ منصوبہ ٹی چوک، روات سے جی ٹی روڈ تک نشیبی علاقوں میں شدید بارش کے دوران سیلاب کی صورت حال کو کم کرنے میں نمایاں مددگار ثابت ہوگا۔وزیر داخلہ محسن نقوی کے ویژن کے مطابق، سی ڈی اے-ڈی ڈبلیو پی کی 77ویں میٹنگ میں اسلام آباد میں صحت مند سرگرمیوں کو فروغ دینے کیلئے شہر بھر میں کرکٹ اور فٹ بال گرانڈز کو اپ گریڈ کرنے کا فیصلہ کیا گیا۔ اس منصوبے کے تحت اسلام آباد میں پانچ کرکٹ اور پانچ فٹ بال گراونڈز کو مستقبل کی ضروریات کو پورا کرنے کیلئے جدید خطوط پر استوار کیا جائے گا اور جدید ترین سہولیات سے مزین کیا جائے گا۔ اس مقصد کیلئے 513.477 ملین روپے کا پی سی-ون منظور کیا گیا۔اس موقع پر چیئرمین سی ڈی اے محمد علی رندھاوا نے کہا کہ ان کرکٹ اور فٹ بال گرانڈز سے حاصل ہونے والی آمدنی انہی گرانڈز کی تعمیر و مرمت، دیکھ بھال، خوبصورتی اور کھیلوں اور ہنر مند کھلاڑیوں کو تلاش کرنے کے پروگراموں کو فروغ دینے کیلئے استعمال میں لائی جائے گی۔
